Shillong, Nailar 4: Ka Shillong Lajong Football Club (SLFC) ka la pynrem ia ka Sawmer da 5 kol la kawei ha ka jingiakhun jong ka Shillong Premier League kaba la long ha JN Stadium mynta ka sngi.
Ia ka kol kaba nyngkong na ka bynta ka Shillong Lajong la thep da u Kenstar Kharshong ha ka 6 minit, ha shuwa ba u kapten kane ka kynhun, u Sheen Sohktung un thep ia ka kol kaba ar ha ka minit kaba 20.
Na ka liang u rangialehkai ka Sawmer, u Rheadolf Daloi u la thep lyngba ka penalty ha ka 62 minit ban iarap ia ka kynhun jong u ban wanphai biang ha kane ka jingiakhun.
U khlur ialehkai ka SLFC Phrangki Buam u la lah ban thep haduh ar kol. Ia ka kol kaba nyngkong u la thep ha ka minit kaba 82 katba ia ka kol kabar u la thep ha shuwa ban kut ka jingiakhun (90+2 minit). Na ka liang u Noarem Mahesh Singh ula thep ia ka kol kaba saw ka Shillong ha ka 88 minit.
Ka Lajong ka la lah ban ialehkai bha naduh ba sdang ka jingiakhun bad ka la ioh ia ka lad ban thep ia ka kol kaba nyngkong hadien ba u Kenstar u la nion da ka khlieh ban thep ia ka bol shapoh gol lyngba ka free-kick kaba la shut da u Samuel Kynshi.
Ka Sawmer ka la duh ia ka kabu ksiar ban thep ia ka kol hadien ba u rangapkol ka Shillong Lajong, u Neithovilie Chalieu u la lah ban iada ia ka free-kick kaba la shut da u Marshal Nongrum.
Ha ka por ba ka Sawmer ka la sdang ban ialehkai bha, u kapten ka Shillong Lajong u la thep ia ka kol kaba ar ha ka 20 minit. Na ka liang u kapten ka Shillong u la jan ioh thep biang ia ka kol kaba lai ha ka minit kaba 30, hynrei ka bol ka la dei ia u dieng kol.
Ka Sawmer ka la lah ban wanphai biang ha kane ka jingiakhun lyngba ka penalty kaba la thep da u Rheadolf ha ka 62 minit.
Ka jingpyrshang jong ka Sawmer ban kyntiew ia ka rangialehkai kiba shadien ban iarap ia ki rangialehkai kiba sha khmat ban ioh ban pynphai sa kawei ka kol, ka la plie lynti ia ka Shillong Lajong ban thep ia ki 3 tylli ki kol ha ki bynta kaba kut jong ka jingiakhun.
U Phrangki u la thep ia ka kol kaba lai na ka bynta ka Shillong Lajong ha ka minit kaba 82 katba u Naorem u la thep ia ka kol kaba saw ha ka minit kaba 88. U Phrangki u la thep ia ka kol kaba ar jong u ha shuwa ban kut ka jingialehkai bad ban pyntikna ba ka Shillong Lajong kan jop ia kane ka jingiakhun da 5 kol la kawei.
Ha ka sngi Nyngkong, ka Malki kan ialeh pyrshah ia ka Nangkiew Irat ha ka por 4 baje janmiet.
(Dur TSR. Sawmer jersey rong saw, Shillong Lajong jersey rong lieh)
