Shillong, Nailar 11: Ka Langsning ka la pynrem ia ka Malki da 4-1 ha ka jingiakhun
jong ka Shillong Premier League, kaba la long mynta ka sngi ha JN Stadium.
Na ka bynta ka Langsning ia ka kol kaba nyngkong la thep da u Ebormi Buam ha ka minit kaba 37. Kiwei pat ki saw tylli ki kol la thep ha ka kylla miet.
Ki kol na ka bynta ka Langsning la thep da u Ronaldkydon Lyngdoh Nonglait (52 minit), Kynsaibor Lhuid (57 minit) bad ka kol kaba la thep hi da u rangapkol ka Malki, u Sbing Chyrmang ha ka 79 minit, kabta ia ka kol na ka bynta ka Langsning la thep da u Ousseynou Kamara (72 minit).
Ka Langsning ka lah ioh ban kumba 70% ia ka bol ha ka jingiakhun ha ka kylla step na ka daw ba ki rangialehkai ka Malki ki la ai suk ia nongialehkai ka Langsning ban knieh suk ia ka bol.
Ka Langsning ka la lah ban ialehkai kham bha bad la iohi ruh lyngba ka jingiakhun ba ka Langsning ka long ka kynhun kaba kynsai tam ha kane ka aiom jong ka Shillong Premier League.
Ha ka minit kaba 37, u Buam um shym la pynlehnoh ei ia ka kabu ksiar bad ban thep ia ka kol kaba nyngkong na ka bynta ka Langsning.
Ha kaba sdang jong ka jingiakhun ha ka kylla miet, ka Langsning ka la lah ban lehkai kham bha shuh shuh. Ha ka minit kaba 52, ka Langsning ka la thep ia ka kol kaba ar lyngba ka kol kaba la thep da u Ronaldkydon.
U Ronaldkydon u la thep ia ka kol hadien ba ka la dei na uwei u rangialehkai uba shadien ka Malki.
Shuh shuh, u rangialehkai ka Langsning, u Kynsaibor Lhuid u la thep ia ka kol kaba itynnat ha kaba ka bol kaba u la shut na jngai ka rung shapoh kol ha ka 57 minit.
Ka Malki ka la lah ban pynphai kawei ka kol ha ka minit kaba 72 lyngba ka kol kaba la thep da u Ousseynou. Kane ka kol ka la ai mynsiem biang ia ki rangialehkai ka Langsning.
Hynrei ha ka minit kaba 79, ka Langsning ka la ioh ban thep ia ka kol kaba saw jong ka jingiahun hadien ba u rangapkol ka Malki u la bakla ban thep ia ka bol sha ka kol lajong.
Kane ka long ka sien kaba ar ba ka Langsning ba ka ioh ia ka jingjop ha kane ka aiom jong ka Shillong Premier League.
Ha ka sngi Nyngkong, ka Nangkiew Irat kan ialeh pyrshah ia ka Meghalaya Police ha ka por 4 baje janmiet.
