Shillong, Nailar 13: Ka jingialehkai hapdeng ka Nangkiew Irat bad ka MLP ha ka Shillong Premier League kaba la long mynta ka sngi ka la kut noh ha ka jingiakhaid ba mar shi kol.
U Niwan-o Gatphoh u la thep ia ka kol na ka bynta ka MLP ha ka minit kaba 62 katba u Lambor Nongsiej u la iarap ban pyniakhaid ia ka Nangkiew lyngba ka kol kaba u la thep ha ka 65 minit.
Kane ka long ka jingiakhun kaba nyngkong jong kane ka aiom mynta u snem ha kaba ka la kut noh ha ka jingiakhaid.
Tangba la iohi ba baroh ar liang kim shym la lehkai bha bad khlem shym don ruh kawei ka bol kaba la shut ba kan poi sha kol.
Ha ka minit kaba 25, u rangapkol ka Nangkiew Irat, u Maitshaphrang Kharumnuid u la lah ban iada ia ka bol kaba la shut da u Niwan.
Ha ka kylla miet, u Niwan u la rah ia ka bol sha ka box jong ka Nangkiew hynrei ha kane ka kynti ruh, u Maitshaphrang u la lah ban iada ia ka bol ban rung shapoh kol.
Ha ka kynti kaba lai, u Niwan u la lah ban thep ia ka kol hadien ba u la ioh ban pyndei ia ka bol sha kol.
Tang hadien lai minit, ka Nangkiew ka la ioh ban pynphai hadien ba u rangapkol ka MLP, u Kenio Lyngkhoi u la thap ia ka bol bad ka bol ka la dei ia u Lambor bad ban rung shapoh kol.
Ha ki bynta kiba khatduh jong ka jingiakhun, ka Nangkiew ka la jan jop hadien ba u Roikhihbha Nongtdu u la shah woh habar jong ka box.
U rangapkol ka MLP u la iada ia ka ‘free-kick’ kaba la shut da uwei na ka rangialehaki ka Rangdajied.
Hadien kane, baroh ar liang ki khlem shuh ioh ia kabu ban thep kol bad ka jingiakhun ka la kut noh ha ka jingiakhid ba mar shi kol.
(Dur TSR. Nangkiew Irat jersey rong saw, Meghalaya Police jersey rong iong)
