Shillong, Nailar 16: Ka Rangdajied United ka la long ka kynhun kaba nyngkong eh ha kane ka aiom jong ka Shillong Premier Leauge kaba lah ban jop baroh lai tylli ki jingiakhun bad kane ka long hadien ba ka la lah ban pynliem noh ia ka Malki da 2-1, ha ka jingiakhun kaba la long hapoh JN Stadium mynta ka sngi.
Ia kine ki lai tylli ki kol la thep ha ka jingiakhun ha ka kylla miet bad ar tylli na kine ki kol ki dei kiba la thep hi sha kol lajong.
Ka jingiakhun ha ka kylla step kam shym long kaba ittynnat, hynrei ki don katto katne ki bynta kaba la pynkyndeh ia ki nongwan peitkai. Ka jingther jong u slap ka long kawei na ki daw kaba la ktah jur ia ka rukom ialehkai.
Ka Malki ka la ialehkai bha haba sdang jong ka jingialehkai ha ka kylla meit. U rangapkol ka Rangdajied, u Padam Chettri u la lah ban iada ia ka bol kaba la khyrwit da u kapten ka Malki, u Ronnie Nongbri ban rung sha kol bad kane ka long ha ka minit kaba 46.
Ka Rangdajied ka la jan ioh ban thep ha ka 63 minit hadien ba Reson Malngiang u la nion ia ka bol da ka khlieh hynrei u rangapkol ka Malki, u Sbing Chyrmang u la thap ia ka bol shabar kol.
Ka Malki ka la shah thep ha ka 64 minit hadien ba u Rikmenlang Marwein u la bakla thep ia ka bol sha kol lajong lyngba ka ‘free kick’ kaba la ioh ka Rangdajied.
Kawei na ki kabu ksiar ba ka Malki ka la ioh ban thep ia ka kol ka long ha ka miit kaba 79 hadien ba u Ronnie u la khyrwit ia ka bol kaba la dei ia u dieng kol.
Ka Malki ka la ioh ban pynphai ha ka 86 minit hadien ba u rangialehkai ka Rangdajied, u Atlanson Kharmaw u la thep sha kol lajong. Ha ka por ba baroh ar tylli ki kynhun ki dang iakhun tyngeh ban jop ia kane ka jingiakhun, u rangaialehkai ka Rangdajied, u Ambilstar Sun u la thep ia ka kol da ka khlieh lyngba ka ‘free kick’ ha ka 89 minit. Lyngba kane ka jingjop, ka Rangdajied ka la ioh 9 point katba ka la ioh tang 3 point na ki lai tylli ki jingiakhun.
La shai ka sngi, ka Sawmer kan ialeh pyrshah ia ka Nangkeiw Irat ha ka por 3:45pm.
(Dur Malki SC. Malki jersey rong blu, Rangdajied United jersey rong lieh)
