Shillong, Nailar 18: Ka Langsning FC ka la pynrem noh ia ka Shillong Lajong FC da 3-1 ha ka Shillong Premier League kaba la long mynta ka sngi ha JN Stadium.
Na ka liang ka Langsning ka la thep ia ar tylli ki kol ha ka kylla step lyngba u Figo Syndai bad u Fullmoon Mukhim katba na ka liang ka Shillong Lajong ka la ioh ban pynphai lyngba ka kol kaba la thep da u Phrangki Buam ha ka 49 minit.
Hynrei, ka Langsning ka la ioh ban thep ia ka kol kaba lai ha ka 82 minit lyngba u Ronaldkydon Lyngdoh Nonglait.
Lyngba ka jingjop ia ki lai tylli ki jingiakhun, ka Langsning ka la ioh 9 point kumba long ka Rangdajed. Tangba ka Langsning ka la long kham hajrong ha ka liang ka jingthep kol (goal difference).
Kane ka long ka sein kaba ar ba ka Shillong Lajong ka la shah rem ha ka aiom ialehkai mynta u snem bad mynta ka don ha ka kyrdan kaba 5.
Ki ar ngut ki rangialehkai kiba la lah ban ialehkai bha ki kyhthup ia ka Phrangki Buam na ka liang ka Shillong Lajong bad u rangapkol ka Langnsing, u Frolicson Dkhar uba la lah ban iada ia bun tylli ki bol ban rung sha kol.
Na ka liang u Frolicson u la lah ban iada ia ka bol ban rung sha kol ha ka 11 minit. Ka Langsning ka la ioh ban thep nyngkong ha ka minit kaba 19 lyngba ka kol kaba la thep da u Milancy Khongstia. Na ka liang u rangapkol ka Langsning u la khanglah ia ka Phrangki ban thep ia ka kol ha ka minit kaba 27.
Ha ka por ba ki rangialehkai ka Shillong Lajong ki dang iakhun tyngeh ban ioh pynphai biang sa kawei, ka Langsning ka la thep biang ha ka 32 minit lyngba ka kol kaba la thep da u Fullmoon.
Hynrei, ki rangialehkai ka Langsning SC ki khlem shym pyni ia ka rukom ialehkai kaba itynnat ha kaba sdang jong ka jingiakhun ha ka kylla miet. Bad kane ka la ailad ia ka SLFC ban pynphai ha ka 49 minit lyngba ka kol kaba la thep da u Phrangki.
Hadien kane ka kol, ka Shillong Lajong ka la don ia ka lad ban wanphai biang sha kane ka jingiakhun. Hynrei, na ki liang ki rangialehkai ka Langsning ki la iakhun tyngeh ban khanglad ia ka SLFC ban pyniaryngkat ia kane ka jingiakhun.
Ha ka minit kaba 82, ka bol kaba la shut da u Rimitre Thma la kah da uwei na ki rangialehkai kiba shadien ka SLFC, hynrei ka bol ka la poi sha u Ronaldkydon uba la shut ia ka bol na jngai bad la iohi ba ka bol ka la rung shapoh kol. Hadien kane, ka SLFC ka la ialeh katba lah ban ioh ban thep hynrei ka jingiakhun ka la kut noh ha kaba ka Langsning SC ka la jop da 3-1.
Ha ka sngi Nyngkong, ka MLP kan ialeh pyrshah ia ka Malki SC ha ka por 3:45 janmiet.
(Dur TSR. Langsning jersey rong saw, Shillong Lajong jersey rong lieh)