Shillong, Nailar 22: Ka dei ka sngi jong ki rangapkol ha ka Shillong Premier League mynta ka sngi, ha kaba ka jingiakhun hapdeng ka Langsning bad ka Sawmer ka la kut ha ka jingiakhaid ba khlem shym don ba lah ban thep.
Ka nongjop jong ka Shillong Premier League ha une u snem ba la dep, ka Lansning SC, kaba don ha ka kyrdan kaba khhliehduh ha ka liang ka jinglah ban kamai point ha kane aiom mynta u snem, ka la wanrah thymmai ia ki 6 ngut ki nongialehkai haba ianujor ia ka kynhun kaba pynrem ia ka Shillong Lajong da 3-1 ha kane ka Sngi Saitjain kaba la dep.
Ka jingwanrah ka Langsning ia ki nongialehkai kam long kaba long phylla namar ka iakhun pyrshah ia ka Sawmer kaba la rem ia baroh ki lai tylli kiba ka la dep ban iakhun. U coach ka Langsning, u Bah Hering Shangpliang u la pynshong ben ia u Frolicson Dkhar, u Dibinroy Nongspung, u Restom Khriam, u Ronalkydon Lyngdoh Nonglait, u Banteilang Shylla bad u Kitboklang Pale ha kane ka jingiakhun kaba mynta. Na ka liang u Bah Hering u la pynmih ia u rangpapkol, u Eric Nongkhlaw, u Rimitre Thma, u Arnesius Marwein, u Roney Khongrangjem bad u Kynsaibor Lhuid ha ka jingiakhun kaba mynta ka sngi.
U Eric u la ialehkai bha ha kaba sdang jong kane jingiakhun ka SPL ha une snem katba u Sunshine Kharmuti u la hap ban kham trei shitom ha kane ka jingiakhun pyrshah ia ka Sawmer.
Ka Lansning ka la ioh ia ka ‘free kick’ hadien ba u Arnesius Marwein u la shah pynkyllon hajan ka box jong ka Sawmer marsien sdang ka jingiakhun. U Sunshine u la nion ia ka bol da ka khlieh ban pyrshang ban thep ia ka kol na kane ka ‘free kick’ ba ka Langsning ka la ioh, hynrei ka bol ka la dei ia u dieng kol.
Ha ka 28 minit, u rangialehkai ka Sawmer, u Justerwell Tham u la pyrshang ban khyrwit ia ka bol na jngai hynrei u rangapkol ka Langsning u la lah ban iada iada ka bol ban rung shapoh kol.
Ka jinglah ka Langsning ban pyni ia ka sap ka rukom ialehkai ha shuwa ban kut ka jingialehkai ha ka kylla step. Dei ha kane ka por ba ka Langsning ka la ioh ia ka ‘corner’ kaba la shut da u Kynsaibor bad u Ebormi uba la ieng mar syndah ka kol u la ioh ban khyrwit ia ka bol hynrei ka bol ka la dei biang ia u dieng kol.
Ha kaba sdang jong ka jingiakhun ha ka kylla miet, u rangapkol ka Langsing u la ban iada ia ar tylli ki kabu ksiar jong ka Sawmer ban thep kol. Ka jingbakla na a liang u u rangapkol ka Langsning ka la wan ha ka por ba ka jingiakhun ka la jan kut artad ha kaba u la bakla rah ia ka bol shabar ka box ka Langsning.
Hynrei ka ‘free kick’ kaba la shut da u rangialehkai ka Sawmer, u Preciouslang Kharbhih ka la her najrong ka kol. U Dibinroy Nongspung u ba la mih ha shuwa ban kut ka jingialehkai na ka bynta ka Langsning u la shut ia ka bol na jngai bad na ka liang u rangapkol ka Sawmer u la khyrniat ia ka bol shabar kol. Kane ka jingiakhun ka la kut noh khlem shym don ba lah ban thep.
Ha ka Sngi Thohdieng, ka Rangdajied kan ialehkai pyrshah ia ka Nangkiew Irat ha ka por 3:45 janmiet.
(Dur TSR. Langsning jersey rong saw, Sawmer jersey rong lieh)
