Shillong, Nailar 24: Ka Rangdajied United ka la kiew sha ka kyrdan kaba nyngkong ha ka Shillong Premier hadien ka jingpynrem ia ka Nangkiew Irat da 3-1, ha ka jingiakhun kaba la long ha JN stadium mynta ka sngi.
U Raikutshisha Buam u la thep ia ka kol kaba nyngkong ia ka Rangdajied ha ka 27 minit ha shuwa ba u Chesterfield Nongdhar un pyniaryngkat na ka bynta ka Nangkiew Irat ha ka 32 minit.
Ka jingiakhun hadien kine ki ar tylli ki kol ki long kiba suki, hynrei ka kol kaba la thep da u Reson Malngiang ha ka 73 minit na ka bynta ka Rangdajied kaba la pynkhie im biang ia kane ka jingiakhun. U Chanmetre Thma u la iarap ia ka Rangdajied ban jop ia kane ka jingiakhun da kaba thep ia ka kol kaba lai ha ka 78 minit.
Ka Rangdajied mynta ka la lah banb kamai ia baroh 12 point na ki saw tylli ki jingiakhun katba ka Nangkiew ka don ha ka kyrdan kaba 4 da kaba ioh 4 point. Ka RUFC ka la knieh ia ka kyrdan kaba nynkong na ka Langsning. Ka Langsning ka don mynta ha ka kyrdan kaba ar da kaba kamai 10 point.
Ka jingiakhun ha kaba sdang jong ka 20 minit la iohi ba baroh ar tylli ki liang ki la pynsep ei ia ki kabu ban thep kol. U Andy Mawthoh u la ioh rah ia ka bol bad buh ia ka bol ia u Buam shabar ka box. U Buam u la ioh rah bad shut ia ka bol sha ka liang ka diang jong u rangapkol ka Rangdajied, u Maitshaphrang Kharumnuid, uba la shu peit ia ka bol kaba la rung shapoh kol.
U Shanborlang Jyrwa uba la wan mih bujli na ka bynta ka Nangkiew u la pyni ia ka sap ialehkai marsien mih madan. San minit hadien ba ka Nangkiew ka la shah thep, u la shut ia ka bol kaba la iada da ki rangialehkai ka Rangdajied bad ka bol ka la leit sha ka liang ka kamon jong u Nongdhar, uba la ioh ban thep ia ka kol.
U Reson u la iarap ia ka Rangdajied ban thep ia ka kol kaba ar tang 20 minit shuwa ban kut ka jingiakhun. U Reson u la iarap ban pynbuh ban pynbuh ia ka bol na ka bynta u Chanmetre Thma uba la thep ia ka kol ha ka minit kaba 78.
Lashai ka sngi, ka Shillong Lajong kan ialeh pyrshah ia ka Malki ha ka por 3:45 janmiet.
(Dur TSR. Rangdajied United jersey rong blu, Nangkiew Irat jersey rong saw)
