Shillong, Nailar 25: Ka Shillong Lajong ka la pynrem noh ia ka Malki da 4-1 ha ka jingïakhun jong ka Shillong Premier League kaba la long mynta ka sngi ha ka JN Stadium.
U Sheen Sohktung bad u Phrangki Buam ki la thep mar ar kol na ka bynta ka Shillong Lajong, katba u Ronnie Nongbri u la thep ia ka kol na ka bynta ka Malki.
Baroh ar tylli ki kynhun ki la hap ban khmih bniah ia ka rukom ialehkai jong ki namar ki donkam ban jop. Ka Shillong Lajong bad ka Malki ki la jop ia ka jingiakhun jong ki ha shuwa ban mad ia ki jingrem ha ki ar tylli ki jingiakhuh kiba shadien, na ka daw ba ki khlem shym la lah ban ialehkai bha.
Hynrei ka Shillong Lajong ka la pyni ia ka Malki mynta ka sngi ia ka sap rukom ialehkai jong ka hynrei ka rukom ialehkai ka Malki ka la nang kham sniew shuh shuh. Kane ka la pynlong ia ka Malki ban rem lai sien kynthih.
Haba peit ia ki rangialehkai ka Malki ki don ka jingiadei kaba jan shabar ka madan hynrei hapoh ka madan iohi shai ba kam don ka jingsngewthuh jingmut.
Na ka liang ka Shillong Lajong ka la pyni ba ka dei ka kawei na ki kynhun kaba sai tam ha ka SPL. Ki la pyni ba ki lah ban ialehkai ym tang shakhmat hynrei wat shadien ruh. Ka rukom iasam bol para nongialehkai ka long shisha kaba ittynnat khamtam ha ka jingialehkai ha ka kylla step, ha kaba ki la ioh ban thep haduh lai tylli ki kol. Kane ka dei ruh ka sein kaba nyngkong ha kane ka aiom ba ka kynhun kan ioh ban thep haduh lai kol ha ka kylla step.
Ka Shillong Lajong ka la ioh ia kabu kaba nyngkong eh ban thep kol ha ka 15 minit ha kaba u Rakesh Pradhan u la rah ia ka bol na ka liang kadiang bad ban buh ia ka bol sha u Sheen uba la thep ia ka kol wat hadien ba u rangapkol ka Malki u la ioh ban thap ia ka bol. U Sheen u la thep ruh ia ka kol kaba ar ha ka 26 minit hadien ba u rangialehkai ka Malki, u Rikmenlang Marwein u la lait ban pyndei ia ka bol da ka khlieh bad u la ioh ia ka lad ban thep ban ia ka bol sha kol.
Hadien kane, u Phrangki u la thep ia ka kol kaba lai na ka bynta ka Shillong Lajong ha shuwa ban kut ka jingialehkai ha ka kylla step. U Phrangki u la ioh thep ia ka kol lyngba ka bol kaba la buh da u Rakesh. Ka Shillong Lajong ka la lah ban ialehkai bha ha ka kylla miet bad u Samuel Lalmuanpuia u la shah khanglad arsien ban thep kol, kawei da u rangapkol ka Malki bad kaba ar hadien ka bol ka dei i u dieng kol.
Ka Malki ka la ioh ia ka korner ha ka 70 minit bad dei hadien ba u rangialehkai u la pyrshang ban ther ia ka bol da ka khlieh bad ka bol ka la poi ha u Ronnie uba la iarap ban pynphai ia ka kol na ka bynta ka Malki. Wat la ka Malki ka la pyrshang tyngeh ban wanphai ha kane ka jingiakhun, hynrei ka kol kaba la thep da u Mahesh Naorem ha ka minit kaba 90 ka la pyntikna ba ka Shillong Lajong kan jop ia kane ka jingiakhun da 4-1.
Hadien kane ka jingjop, ka Shillong Lajong ka don ha ka kyrdan kaba 3 da kaba ioh 6 point hadien ka Rangdajied kaba ioh 12 point bad ka Langsning kaba ioh 10 point.
Ha ka sngi Nyngkong, ka Sawmer kan ialeh pyrshah ia ka MLP ha ka por 3:45 janmiet.
(Dur TSR. Shillong Lajong jersey rong saw, Malki jersey rong iong)
