Shillong, Nailar 27: Ka MLP ka la kiew sha ka kyrdan kaba lai ha ka Shillong Premier League hadien ka jingjop ia ka Sawmer da 2-1, ha ka jingiakhun kaba la long ha JN Stadium mynta ka sngi.
U Lalramtara Ngamlai u la thep ia ka kol kaba nyngkong na ka bynta ka MLP ha shuwa ban kut ka jingiakhun ha ka kylla step. Na ka liang u Niwan-o Gatphoh u la la thep ia ka kol kaba ar ha ka 62 minit ban iarap ban tam 2-0.
Ka Sawmer ka lah ban pynphai ia kawei na ki kol ha ka 90 minit lyngba ka kol kaba la thep da u Shaibor Nongrum. Ka kol kaba la thep da u Shaibor ka dei ka kol kaba 50 jong ka SPL mynta u snem.
Ka MLP ka don mynta ka 7 point kaba long shi point halor ka Shillong Lajong, kaba la hiar noh sha ka kyrdan kaba saw.
Napdeng ki 7 tylli ki kynhun kiba iakhun ha ka SPL, ka Sawmer ka don ha tduh da kaba ioh tang 1 point.
Ha kane ka jingiakhun, ka Sawmer ka la khyrwit shibun ki bol sha ka kol ka MLP hynrei kam don kawei ruh ka bol kaba la buh jingeh ia u rangapkol, u Kenio Lyngkhoi.
Lah ban kdew, ka MLP ka long ka kynhun kaba kham khlain haba ianujor ha kane ka jingiakhun. Ka MLP ka la ioh ban thep ha shuwa ban kut ka jingiakhun ha ka kylla step (45+3 minit) hadien ba u Tyngshainlang Rani u la buh ia ka bol na ka bynta u Ngamlai, uba la thep ia ka bol sha kol.
Ha ka jingiakhun ha ka kylla miet bad tang 5 minit hadien ba la mih madan, u Niwan u la thep ia kol kaba ar na ka bynta ka MLP. Wat la ka MLP ka la long ka kynhun kaba kham ha khmat, hynrei ka jingiakhun ka la sdang ban phai sha ka liang ka Sawmer ha kylla ka miet.
Ka Sawmer ka la don ia ka jingkyrmen ban wanphai biang sha kane ka jingiakhun hadien ba u Justerwell Tham uba la buh ia ka bol na ka bynta u Bankyrshan L Mawphlang uba la rah sha ka box.
Na ka liang u Shaibor u la thep ia ka kol hadien ba ka bol kaba la iada da u kol ka Sawmer ka la wan phai biang sha ka liang jong u. Ka Sawmer ka la iakhun tyngeh ban pynphai ia ka kol kaba ar hynrei ka khlem shym lah ban iada na ka jingrem kaba 4 kynthih na ki 5 tylli ki jingiakhun.
Ha ka Sngi Balang, ka Nangiew Irat kan iakhun pyrshah ia ka Shillong Lajong ha ka por 3:45 janmiet.
(Dur TSR. Sawmer jersey rong saw, Meghalaya Police jersey rong iong)
