Shillong, Nailar 29: Ka Shillong Lajong ka la jop da ka said ia ka Nangkiew Irat ha ka jingiakhun jong ka Shillong Premier League kaba la long ha JN Stadium mynta ka sngi.
U kapten jong ka Shillong Lajong, u Samuel Lalmuanpuia u la thep ia ka kol lyngba ka penalty kaba la iarap ia ka kynhun jong u ban kamai baroh 3 point na kane ka jingiakhun. Lyngba kane ka jingjop, ka SLFC ka la poi sha ka kyrdan kaba 3. Lah ban kdew, ka Shillong Lajong ka la ioh ia ka penalty hadien ba ka bol ka la dei ka kti jong u Khangmiki Pale, ha ka por ba u Lalmuanpuia u dang pyrshang ban pyllait ia ka bol.
Na ka liang u ‘linesman’ u la pyni ia u rephri ba ka bol ka la dei na ka kti ha Khangmiki ha kaba ki rangialehkai ka Nangkiew Irat ki la pynpaw ia ka jingpyrshah jur.
U rangapkol ka Nangkiew, u Maitshaphrang Kharumnuid uba la lah ban ialehkai bha ha kane ka jingiakhun bad u la lah ban iada ia bun tylli ki bol ban rung sha kol. Hynrei u Maitshaphrang u khlem shym lah ban iada ia ka penalty kaba la shut da u Lalmuanpuia.
Ka SLFC ka la long kaba donbok shisha ban ioh kamai ia baroh 3 point namar ha ka jingshisha ka khlem shym lah ban ialehkai bha. Lah ban iohi ba ka Shillong Lajong ka la pyrshang kumba 20 sien ei ei ban thep kol hynrei tang kumba 6 tylli ka la poi shapoh kol.
Na ka liang ka Nangkiew ka la ailad ia ka SLFC ban kan pyniaid ia ka jingialehkai hapdeng madan khamtam ha ka jingiakhun ha ka kylla step. La iohi ba ki rangialehkai ka Nangkiew Irat ki kham sngewtynnad ban ailad ia ka Shillong Lajong ban tur shapoh kol jong ki.
Hynrei kane kam mut ba ka Shillong Lajong ka la shim kabu ia kane ka rukom ialehkai na ka liang ka Nangkiew Irat. Ki la khyrwit kumba 5 sien sha kol hynrei tang ka bol kaba la shut da u Phrangki Buam kaba la buh jingeh ia u rangapkol ka Nangkiew Irat.
Ha ka jingiakhun ha ka kylla meit, ka Nangkiew Irat ka la wanrah ia ka jingkylla ia ka rukom ialehkai bad kane ka la kham pynitynnat ia kane ka jingiakhun. Ha ka minit kaba 50, u Sheen Sohktung u la ioh ia kabu ksiar ban thep ia ka kol ha kaba u donkam ban pyllait tang ia u rangapkol ka Nangkiew Irat hynrei ka bol ka la dei ia u dieng kol. Ka SLFC ka la ioh biang ia ka kabu ban thep hadien 12 minit hynrei na ka liang u Maitshaphrang u la khanglad biang ia ka Shllong Lajong ban ioh thep.
Ha ka por ba i kumba ka jingiakhun kan kut ha ka jingiakhaid, ka SLFC ka la ioh ia ka penalty kaba la pynshaiong ia ki rangialehkai ka Nangkiew Irat. Ha kane ka aiom jong ka SPL, dei ka sien kaba nyngkong ba ka kynhun kaba ioh ban thep ia ka kol ha ka sekon kaba khatduh ban ioh ia ka jingjop. Lyngba kane ka jingrem, ka Nangkiew ka sahkut ha ka kyrdan kaba 5 da kaba ioh tang 4 point.
Lashai ka sngi, ka Rangdajied kan ialeh pyrshah ia ka Langsning ha ka por 3:45 janmiet.
(Dur TSR. Nangkiew Irat jersey rong saw, Shillong Lajong jersey rong lieh)
