Shillong, Nailur 03: Ka Shillong Lajong ka lah ban wanphai hadien ba ka la shah tam da 2-1 bad pynrem shi syndon ia ka Rangdajied United da 4-2 ha ka jingiakhun jong ka Shillong Premier League kaba la long ha JN Stadium mynta ka sngi.
Ka Shillong Lajong ka long ka kynhun kaba nyngkong ha kane ka aiom mynta u snem ban jop ia ki jingiakhun hadien ba ka la shah tam. Kane ka long ruh ka sein kaba nyngkong ba ka Rangdajied ka la shah rem ha ka wat kaba nyngkong (first leg) jong ka SPL mynta u snem.
Wat hadien kane ka jingshahrem ka Rangdajied ka dang don hi ha ka kyrdan kaba nyngkong da kaba ioh 13 point bad ka lah ban sha knieh noh ia ka kyrdan kaba nyngkong ha ka Langsning kaba don mynta 11 point. Ka Langsning kan ialeh pyrshah ia ka MLP lashai ka sngi. Ka Shillong Lajong lyngba kane ka jingjop ka la kiew sha ka kyrdan kaba ar da kaba ioh 12 point.
Haba phai sha ka jingiakhun kaba mynta ka sngi, U Andy Mawthoh u la iarap ia ka Rangdajied ban thep nyngkong ha ka 5 minit bad kane ka long ka kol kaba sted tam ha kane ka aiom ka SPL.
Wat hadien ba ka la shah thep, ka Shillong Lajong ka long ka kynhun kaba kham khlain haba ianujor ia ka Rangdajied. Hynrei ka dei ka jingbakla halor ka rukom ai bol kaba la ailad ia ka Rangdajied ban iai bat ia ka jingtam kaba shi kol haduh kaba kut jong ka jingialehkai ha ka kylla step.
Ha kaba sdang jong ka jingialehkai ha ka kylla step, u rangialehkai ka Shillong Lajong, u Sheen Sohktung u la shah pynkyllon ha u kapten ka Rangdajied u Ambilstar Sun hapoh box bad u Sheen u la thep lyngba ka penalty ha ka 52 minit ban iarap ia ka SLFC ban iakhaid mar kawei.
Kane ka la pynkyndit ia ka Rangdajied bad ka la sdang ban nion ia ka rukom ialehkai sha khmat. Dei ha ka 65 minit, u Aiban Dohling uba dang pyrshang ban pyllait ia ka bol ba la buh da u rangialehkai ka Rangdajied hynrei ka bol ka la poi sha u Samson Nongrum, uba khyrwit ia ka bol ban rung shapoh kol. Ka kol ba la thep da u Samson ka la iarap biang ia ka Rangdajied ban tam da 2-1.
Wat hadien ka jingtam kaba shi kol, la iohi ba ka Rangdajied ba kwah ban ialeh kai noh shadien. Hynrei kane ka jingiakhun ka la phai bak la bak sha ka liang ka SLFC. Ha ka minit kaba 71, u Sheen u la mareh shapoh box bad buh ia ka bol sha ka liang kamon jong u kapten uba la buh kylla ia ka bol sha u Samuel Lalmuanpuia. U Lalmuanpuia u la khyrwit tyngeh bad ka bol ka la lait na u rangapkol ka Rangdajied, u Germy Passah bad ban iarap biang ia ka SLFC ban iakhaid ha kane ka jingiakhun.
Tang 5 minit hadien, u Lalmuanpuia u la shut ia ka korner bad u Novin Gurung u la shut ia ka bol kaba rung shabar u line jong ka kol bad iarap ia ka Shillong Lajong ban tam da 3-2.
La iohi ba ki rangialehkai ka Rangdajied ki la duh mynsiem hadien kane ka ko. Wat la ka la pyrshang tyngeh ban wanphai biang ha kane ka jingiakhun hynrei ka kol kaba ka thep da u Lalmuanpuia ha ka 84 minit ka la iarap shi syndon ia ka Shillong Lajong ban jop ia kane ka jingiakhun da 4-2. Ym don ba lah ban len ba ka Shillong Lajong ka khlem ialehkai kumba la khmih lynti hynrei ka la pyni ba ka long ka kynhun kaba lah ban jop ia ki jingiakhun kiba iakhaid.
Ka Langsning kan nym sngewshih ban iohi ia ka jingrem jong ka Rangajied namar kane ka la ailad ia kane ka kynhun ban kiew sha ka kyrdan kaba nyngkong lada ka lah pynrem ia ka MLA ha jingiakhun ka ban long lashai ka sngi ha ka por 3:45 janmiet.
(Dur TSR. Shillong Lajong jersey rong saw, Rangdajied United jersey rong lieh)
