Shillong, Nailur 04: Wat hadien ba ka hap ban iakhun tang 10 ngut, ka Langsning ka la lah ban pynrem ia ka MLP da 3-0 ha ka jingiakhun jong ka SPL kaba la long ha JN Stadium mynta ka sngi.
Lyngba kane ka jingjop, ka Langsning ka la kiew sha ka kyrdan kaba nyngkong da kaba kamai 14 point. Ka Rangdajied United ka la hiar sha ka kyrdan kaba ar da kaba ioh 13 point katba ka Shillong Lajong ka don ha ka kyrdan da kaba kamai 12 point.
U Milancy Khongstia, u Arnesius Marwein bad u Kitboklang Pale ki la thep na ka bynta ka Langsning. U Milancy Khongstia u la ioh ia ka red card kaba nyngkong jong kane ka aiom hadien ba u la nion nadien ia u Raja Shadap.
Ka dei ka jingialehkai bha na ka liang u Ebormi Buam bad u Pale kaba iarap ia ka Langsning ban ioh pynrung ia ka bol sha khmat bad kaba la iarap u Milancy ban rah ia ka bol na ka liang ka mon shapoh ka box bad ban thep shi syndon ia ka bol shapoh kol. Ka MLP ka la ioh ban khyrwit tang 3 tylli ki bol shapoh kol ha kane ka jingiakhun. Ka dei ka Langsning kaba la ialehkai bha naduh ka minit kaba sdang jong ka jingiakhun ha ka kylla step.
U Figo Syndai uba la shah khanglad ar sien ban thep kol u la shah bujli na ka daw ka jingmynsaw katba u Arnesius Marwein u la mih bujli u la khanglad ha ka minit kaba 26 ban ioh ban thep kol.
Ha shuwa kane, u Pale u la ioh ia kabu ksiar ban thep ha kaba u la shut ia ka bol na jngai bad ka bol ka la dei ia u dieng kol. Ka jingiakhun ha ka kylla miet ka la long hi kumjuh ha kaba ka Langsning ka la ong ka kynhun kaba khlam khlain. U Arnesius Marwein u la thep ia ka kol kaba ar ha ka minit kaba 51.
Shiphew minit hadien kane, u Khongstia u la shah beh hadien ba u la ioh ia ka ‘red card’. U Khongstia u la ioh red card haba pyrshang ban pyllait ia ka bol bad u la kum bakla ban nion ia u Shadap nadien. Hadien ba ka Langsning ka la hap ban iakhun tang shiphew ngut, u Kitbok Pale u la thep ia ka bol sha kol ha ka 82 minit. Ka jingiakhun kaba khatduh jong ka wat kaba nyngkong (first leg) jong kane ka aiom ka SPL kan long ha ka sngi Saitjain ha kaba ka Malki kan iakhun pyrshah ia ka MLP. Kane ka jingiakhun ka dei kaba la pynsangeh ha ka 20 tarik u Nailar.
(Dur TSR. Meghalaya Police jersey rong saw, Langsning jersey rong lieh)
