Shillong, Nailur 08: Hadien ka jingbymlah ban ialehkai bha mynta u snem, ka Malki kan rung sha ka wat kaba ar jong ka Shillong Premier League ha ka kyrdan kaba saw, hadien ka jingpynrem ia ka MLP da ka 2-0 ha ka SPL mynta ka sngi.
Kane ka jingjop ka pynlong ia ka Malki ban ia ryngkat mar hynniew point bad ka MLP. Hynrei ka Malki ka don kham hajrong na ka daw ba ka la lah ban pynliem ia ka MLP bunsien. U Primrose Lawat u la thep ha ka 12 minit bad ka dei ka kol kaba nyngkong ba ka Malki ka la lah ban thep ha ka jingialehkai ha ka kylla step mynta u snem. Kane ka dei ka jingjop kaba nyngkong ia ka Malki naduh ba la jop ia ka jingiakhun kaba nyngkong eh ha kane ka aiom ka SPL da kaba pynrem ia ka Nangkiew Irat da 3-1.
Hadien kane ka la jingshah rem laisien snem kynthih bad kumjuh jingiakhaid bad ka Sawmer. Hynrei mynta ka sngi ka Malki ka lah ban ialehkai bha, wat la ka jingialehkai ha ka kylla step kam shym da long kaba ittynnat.
U Bowari Khongstia u dei uba la plie lynti ia ka Malki ban thep ia ka kol kaba nyngkong hadien ba u la rah ia ka bol na ka liang kadiang bad u la pyllait ia ka bol sha u Lawat uba la pynkhih ia ka jar hadien ba u nongapkol ka MLP, u Kenio Lyngkhoi u khlem shym ioh kurup ia ka bol.
Ha ka minit kaba 23, ka MLP ka la ioh ia ka lat ban thep lyngba ka ‘free kick’. Hynrei u nongapkol, ka Malki u Sbing Chyrmang u la ioh kurup ia ka bol. Hadien kane, ka jingiakhun ka la sdang kham ittynnat khamtam ha kaba sdang jong ka jingiakhun ha ka kylla miet hadien ka ba ka bol kaba khyrwit da u Vinici Darlong ka la dei ia u dieng kol. Hadien kane, ka bol kaba la khyrwit da u Ousseynou Kamara ruh ka la dei biang ia u dieng kol. Hadien ka jingiakhun ka la iaid kumba shi bynta, u kapten ka Malki, u Ronnie Nongbri u la buh ia u Khongwir uba la shut ia ka bol bad ka la bol ka la pei na u nongapkol ka MLP bad ka bol ka rung sha kol.
Lah ban ioh ba ym don uwei ruh uba kmen hapoh ka kynhun ki nongialehkai ka Malki bad u Dieye Hamidou, uba la shah pynmih ha ka jingiakhun ha ka kylla miet u la pynpaw ia ka jingsngewdom hadien ba u la shah sei noh ha shuwa ban kut ka jingiakhun da u coach, u L Darlong.
Ka jingiakhun jong ka wat kaba ar (second leg) kan long ha ka sngi Nyngkong hapdeng ka Shillong Lajong bad ka Nangkiew Irat ha ka por 5:30 janmiet.
(Dur Malki SC. Meghalaya Police jersey rong saw, Malki jersey rong iong)
