Shillong, Nailur 12: Ka jingsniew ka madan SSA Stadium kaba la tip ruh kum ka madan First Ground, ka la ailad ia ki kynhun kiba kham tlot ban iaryngkat bad ki kynhun kiba don ha ka kyrdan kaba shajrong ha ka SPL. Ka dei ruh ka kynti kaba lai ba ka kynhun kaba don sha tdong ka la ioh ban knieh shi point na ka jingiakhun bad ka kynhun kaba lah kamai kham bun point ha ka wat kaba nyngkong (first leg) jong ka SPL mynta u snem.
Ha kane ka kynti, ka dei ka jingiakhun hapdengk a Langsning bad ka MLP kaba la iakhaid noh mar kawei hadien ba ka Shillong Lajong ka la iakhaid bad Nangkiew Irat bad kumjuh ka Rangdajied United ka la iakhaid bad ka Sawmer ha ka jingiakhun kaba long mynnin ka sngi.
Ka Langsning ka la shah tam ha ka sien kaba nynkong ha ka aiom ialehkai mynta u snem hadien ba u Lalramtara Ngamlai u la thep ia ka kol kaba nynkong na ka bynta ka MLP ha ka minit kaba 26. Tangba ka Langsning ka la ioh ban pynphai ha shuwa ban kut ka jingiakhun ha ka kylla step lyngba ka kol kaba la thep da u Rimitre Thma. Hadien kane ka kol ym shym ba don shuh ba lah ban thep.
Ka madan mynta ka sngi ka la long kaba kham rkhiang hynrei ki nongialehkai ki dang shem jingeh hi ban pyllait bad rah ia ka bol.
Ka Langsning ka la ioh ia ka lad kaba nyngkong ban thep ha ka minit kaba 15 hadien ba ka bol kaba la nion u Arnesius Marwein da ka khlieh ka la lait salit na kol.
Ka nongjop ia ka SPL ha une u snem ba la dep ka la ioh biang ia ka lad ban thep kol ha ka minit kaba 36 hadien ba ka bol kaba shut da u Kitboklang Pale ka la her najrong kol. Shuh shuh, u nongapkol ka MLP, u Kenio Lyngkhoi u la iada ia ka bol kaba la shut u Brolington Warlarpih na shabar jong ka box.
Hadien ba ka la ioh bun tylli ki kabu ban thep, ka Langsning ka la ioh ban pynphai hadien ba u Rimitre u la thep ia ka kol lyngba ka bol kaba la buh da u Ebormi Buam ha shuwa ban kut ka jingiakhun ha ka kylla miet. Ka Langsning ka iai bat ia ka kyrdan kaba nyngkong da kaba ioh 15 point katab ka la MLP ka ka kiew sha ka kyrdan kaba 4 da kaba ioh 8 point.
Ha ka sngi Thohdieng, ka Malki kan ialeh pyrshah ia ka Shillong Lajong ha ka por 5:30 janmiet.
(Dur TSR. Langsning jersey rong saw, Meghalaya Police jersey rong iong)
