Shillong, Nailur 14: Ka jingiakhun hapdeng ka Malki bad ka Shillong Lajong hapoh ka SPL kaba la buh ban long mynta ka sngi la hap ban pynsangeh na ka daw ka jingjur palat u slap.
Ki kynhun bapher bapher ki la shem jingeh ha kaba sdang jong ka wat kaba ar (second leg) ka SPL 2018 naduh ba la pynlong mynta ha SSA Stadium.
Wat lada u slap um da jur ha u Nailar, hynrei mynta u bnai ka nongbah Shillong ka la ioh pdiang kham bun u slap. Bad la iohi ba na ka daw ka jingbymbiang ki nala ha madan ialehkai jong ka SSA la buh jingeh shishia ia ki nongialehkai namar ka jingktieh palat ka madan.
Naduh ka jingiakhun kaba nyngkong jong ka wat kaba ar (second leg) hapdeng ka Shillong Lajong bad ka Nangkiew Irat la iohi ba ka madan kam long kaba biang namar ki nongialehkai ki la shah tap ha ka ktieh. Kaba phylla ruh ban iohi ba baroh lai tylli ki jingiakhun ha kane ka madan ka la kut noh ha ka jingiakhaid.
Na ka liang ka TSR ka la ioh shibun ki jingkynthoh na ki paidbah ha kaba iadei bad ki lai tylli ki jingiakhun kiba la long hapoh ka madan ialehkai ka SSA bad uwei na ki coach bapawkhmat ka jylla, u la pynpaw ba ka madan ka long thik kum ka pynthor kba.
Uwei na ki paidbah u la kynthoh hapoh YouTube channel, ba kane ka madan ialehkai ka long thik kum ka madan kaba iakhun ki muid. Uwei na ki heh ophisar barim ka tnad Directorate of Sports & Youth Affairs u la pynpaw ia ka jingsngewkhia ba ka jingsniew ka madan ka lah ban pynmynsaw ia ki nongialehkai.
Namar la khmih lynti ba u slap un jur wat ha ka sngi Saitjain, ngin hap ban peit ba lada ia ka jingiakhun hapdeng ka Nangkiew Irat bad ka Rangdajied United yn lah ban pynlong ne em.
(Dur TSR)
