Shillong, Nailur 15: Ka jingiakhun hapdeng ka Nangkiew Irat bad ka Rangdajied United ha ka SPL kaba la long ha SSA Stadium mynta ka sngi, ka la kut noh ha ka jingiakhaid kaba mar kawei.
U Emerson Nongrud u la iarap ban thep nyngkong ia ka Nangkiew Irat ha ka 89 minit ha shuwa ba u Raikutshisha Buam un pyniakhaid na ka bynta ka Rangdajied lyngba ka corner ha ka 90+3 minit.
La pynlong ia kane ka jingialehkai hadien ba la hap ban pynsangeh noh ia ka jingiakhun hapdeng ka Malki bad ka Shillong Lajong mynnin ka sngi na ka daw ka jingther palat u slap.
Ka jingshit ka suin byneng mynta ka sngi ka la iarap ban pynkhriang ia ka madan ialehkai ka SSA, wat la ka madan kam pat long kaba biang na ka bynta ban iarap ia ki nongialehkai.
Ka Rangdajied ka long ka kynhun kaba khlam khlain ha ka jingiakhun mynta ka sngi hynrei ka khlem shym lah ban pynpra ia ki rangialehkai kiba shadien ka Nangkiew Irat. U Samson Nongrum u la jan ioh thep ha ka minit kaba 10 hynrei ka bol ka la her najrong u dieng kol.
Ka Nangkiew Irat ka la lah ban ialehkai kham bha ha ka jingiakhun ha ka kylla miet bad u Barman Roy Nongsiej u la shah khanglad ban ioh thep da u nongapkol ka Rangdajied, u Padam Chettri uba la thap ia ka bol shabar ka kol.
Ka kol kaba nyngkong ka la wan hadien ba u Damehun Syih u la buhb ia ka bol na ka bynta u Lambor Nongsiej. U Lambor u la khyrwit ia ka bol sha kol hynrei u Chetri u la ioh thap ia ka bol bad ka leit sha u Emerson u ba la thep ia ka kol kaba nyngkong ha ka SPL mynta u snem. Hynrei, ka RUFC ka la ioh ia ka corner ha shuwa ban kut ka ka jingihun bad u Raikutshisha u la thep ia ka bol sha ka kol da kaba nion da ka khlieh. Kane ka dei ka jingiakhun kaba saw kaba la ialeh ha madan SSA ba ki kynhun ki la iakhaid.
Ha ka sngi Nyngkong, ka Meghalaya police kan ialeh pyrshah ia ka Sawmer ha ka por 5:30 janmiet.
(Dur TSR. Nangkiew Irat jersey rong saw, Rangdajied United jersey rong blu)
