Shillong, Nailur 17: Hadien ka jingrem saw sien kynthih bad iakhaid ha ki lai tylli ki jingiakhun, ka Sawmer ka la pynrem ia ka MLP da ka 1-0 ha ka jingiakhun hapoh Shillong Premier League 2018, kaba la long ha SSA Stadium, mynta ka sngi.
Wat la kane ka jingiakhun ka long kaba iakhaid, u Gamelial Kharlyngdoh u la pynkhih jar ha ka 90+2 minit ban iarap ia ka Sawmer ban khur baroh 3 point na kane ka jingiakhun. Lyngba kane ka jingjop, ka Sawmer ka a ioh ban kamai 6 point hynrei ka dang sah hi ha tduh napdeng ki 7 tylli ki kynhun hapoh ka SPL.
Ka MLP ka sahkut ha ka kyrdan kaba 4 da kaba kamai 8 point. Ka madan mynta ka sngi ka la rkhiang bha hynrei na ka daw ka jingkhohruh ka madan ka rukom ialehkai kam da long kaba biang. U Fernando Mannar bad u Yasamlang Khyriem ki la long ki nongialehkai kiba leh bha tam na ka bynta MLP.
Hynrei ka MLP ka long ka kynhun kaba thep kol duna tam ha kane ka aiom jong ka SPL. Ha shuwa ban kut ka jingiakhun, u Kenio Lyngkhoi u la iada ia ka bol ha syndah u dieng kol ka MLP. Lyngba kane, ka Sawmer ka la ioh ia ka corner bad u Gamelial Kharlyngdoh u la thep ia ka kol ha shuwa ban put u rephri ban pynkut ia ka jingiakhun.
Lashai ka sngi, ka Malki kan iakhun pyrshah ia ka Langsning ha ka por 5:30 janmiet.
(Dur barim TSR)
