Shillong, Nailur 18: Ka Langsning ka la pynrem ia ka Malki da 4-1 ha ka wat kaba ar jong ka Shillong Premier League, 2018 kaba la long mynta ka sngi ha SSA Stadium. Na ka liang u Donborlang Nongkynrih bad u Kynsaibor Lhuid ki la thep mar ar kol na ka bynta ka Langsning. Na ka liang u Vinici L Darlong u la thep ia ka kol na ka bynta ka Malki. Lah ban kdew, ka Langsning ka la jop hi da 4-1 ha ka jingiakhun ha ka wat kaba nynkong pyrshah ia ka Malki, kaba long ha ka 11 tarik u Nailar.
Na ka liang u Donlad Diengdoh u la iarap ban pynbuh ia ka bol na ka bynta ar tylli ki kol katba u nongapkol ka Langsning, u Frolicson Dkhar u la iada ia ar tyli ki bol ban khanglad ia ka Malki ban thep. Ka Langsning ka don ha kyrdan kaba nyngkong da kaba kamai 18 point lyngba 5 tylli ki jingjop bad lai tylli ki jingiakhiad. Haduh mynta ka Langsning kam pat rem wat tang shisien ruh.
Ka bol kaba la buh da u Figo Syndai sha u Diengdoh ha ka 13 minit uba la pyllait ia ka bol na ka bynta u Donborlang uba la thep ia ka bol sha kol da kaba suk.
Ha ka 30 minit, u Donborlang u la shah khanglad ban thep ia ka kol kaba ar hadien u nongapkol ka Malki, Sbing Chyrmang u la iada ia ki bol ban rung sha kol. Tang hadien shi minit, u Donborlang u la thep ia ka kol kaba ar jong u da kaba nion da ka khlieh. Ka Malki ka shym lah ban ialehkai bha ha ka jingiakhun ha ka kylla step.
Ka Malki ka la pyrshah ban nion sha khmat ha ka kylla miet. U nongapkol ka Langsning u la khanglad ia u Alem Khongwir ban thep ha ka 53 minit. Ka Langsning ka la ioh thep ia ka kol kaba lai ha ka 64 minit lyngba ka kol kaba la thep da u Kynsaibor.
Ka Malki ka la ioh ia ka lad ban pynphai shi kol ha ka 68 minit hadien ba u Ronnie Nongbri u la buh ia ka bol shapoh box bad u Darlong u la thep ia ka kol. Ka jingpyrshang na ka liang ka Malki ban wanphai ha kane ka jingiakhun ka la kut noh hadien ba u Kynsaibor u la shim kabu ia ka jingbymsngewthuh jingmut hapdeng ki rangialehkai ka Malki bad ban iarap ia ka Langnsing ban jop ia kane ka jingiakhun da 4-1. Lyngba kane ka jingrem, ka Malki ka sahkut ha ka kyrdan kaba 5 da kaba 7 point.
Ha ka sngi Balang, ka Rangdajied United kan ialeh pyrshah ia ka Shillong Lajong ha ka por 5:30 janmiet.
(Dur TSR. Malki jersey rong blu, Langsning jersey rong lieh)
