Shillong, Nailur 19: Sa shisien ka Shillong Sports Association ka la hap ban pynsangeh ïa ka jingiakhun ha ka Shillong Premier League 2018. Mynta ka sngi ka dei ka jingiakhun hapdeng ka Rangdajied United bad ka Shillong Lajong, kaba la hap ban pynsangeh na ka daw ka bym lah ban pyntikna.
Haba kylli na ki dkhot ka SSA, ki la iathuh ba ki la hap ban pynsangeh ia kane ka jingiakhun na ka daw ka jingthut ki ‘floodlight’ sha ka liang ba don ka Wahumkhrah. Ha kajuh ka por, ki dkhot ka SSA ki la pynpaw ruh ba ki lah ban pynlong ia ka jingiakhun ha ka sngi Thohdieng ha ka por mynsngi.
Na ka liang u TSR kabala ieng shabar ka stadium ka la ioh sngew ba ka don ka jingiakren ba kam dei na ka daw ka jingthut ki ‘floodlight’ hynrei ka dei na ka daw ba ki rephri ki la kdew ia ka jingbymshai ki ‘floodlight’ kaba lah ban pynmynsaw ia ki nongialehkai. Ki rephri ki la kyrngah ban put namar ki sheptieng ba ioh mynsaw ki nongialehkai.
Sa uwei u dkhot ka SSA u la buh jingkylli kumno ki ki rephri kin kren halor ka jingmynsaw ki nongialehkai. Balei ki rephri kin batai stad ada ki nongialehkai dalade kim don kano kano ka jingeh ban ialehkai, la bynrap une u dkhot ka SSA.
Ia ka floodlights hapoh ka SSA Stadium la pynieng mynshym snem. Kumba la pynbeit la pyniakhun ia ka wat kaba ar (second leg) ka SPL mynta u snem hapoh ka stadium ka SSA. Hynrei ka TSR ka sngew ba ki paia kiba pynieng ia ki ‘floodlight’ ki lyngkot palat. Ki light ki long kiba dum bad ka buh jingeh ban shon dur bad ki paia la pynieng hapdeng ki jaka shong bad ki jaka ialehkai bad kane pynwit ia ki nongialehkai.
La iohi bunsien ba ki rephri ki hap ban da ia ki khmat lada ka bol ka her shajrong bad kane ka pyni shai bad ki paia kiba pynieng ia ki ‘floodlight’ ki lyngkot palat.
Ym tang ki paidbah kiba la pynpaw ia ka jingbymsngewhun ia ka rai jong ka SSA ban pynsangeh ia kane ka jingiakhun hynrei uwei na ki coach jong kawei na ki kynhun ka SPL, u la pynpaw ba kane ka rai ha ka khyllipmat kaba khatduh ka long ka bym lah ban pdiang da lei lei ruh. Lah ban kdew, ka SSA ka la shim ia kane ka rai kumba shiteng kynta ha shuwa ban sdang ka jingiakhun.
Kane ka dei ka jingiakhun kaba ar jong ka Shillong Lajong kaba la hap ban pynsangeh noh. Ka jingiakhun jong ka Lajong pyrshah ia ka Malki kaba dei ban long ha ka 14 tarik u Nailur la hap ban pynsangeh na ka daw ka jingjur u slap. Ha ka wat kaba nyngkong, ka jingiakhun hapdeng ka MLP bad ka Malki la hap ban pynsangeh noh hadien ka jingbymwan ki nongkhar bol.
Ka SSA haduh mynta kam pat pynbna ia ka por na ka bynta ka jingiakhun hapdeng ka MLP bad ka Nangkiew Irat ha ka sngi Thohdieng.
(Dur TSR)
