Shillong, Nailur 28: Ka Nangkiew Irat ka la pynliem ia ka Malki da 3-2, ha jingiakhun hapoh ka Shillong Premier League, kaba la long ha SSA Stadium, Polo mynta ka sngi.
U Lakhon Surong u la thep shuwa na ka bynta ka Malki ha ka 28 minit da kaba nion da ka khlieh bad u nongapkol ka Malki u la iada ia ka penalty kaba la shut da u Damehun Syih badn khang ia ka Nangkiew Irat ban pynphai sha shuwa ban kut ka jingiakhun ha ka kylla step.
Ha ka jingiakhun ha ka kylla miet, u Damehun bad u William Pouliankhum ki la thep ia ki kol hapoh ka shi minit ban iarap ia ka Nangkiew ban tam ia kane ka jingiakhun da 2-1.
Ka Malki ka la ioh ia ka penalty bad ia kane la thep da u Ousseynou Kamara ha ka 76 minit hynrei u Kamara u la thep shapoh ka kol lajong haba pyrshang ban pyllait ia ka bol shabar kol.
Ka jingiakynduh kine ki ar tylli ki kynhun ha ka wat kaba nyngkong la ioh ba ka Malki ka la jop da 3-1. Ka Malki ka la angnud ban jop iane ka jingiakhun ban poi sha ka kyrdan kaba saw.
U Surong u la thep ia ka kol kaba nyngkong lyngba ka ‘corner’ kaba la shut da u Alem Khongwir. Ka Nangkiew ka la jan ioh ban pynphai ha ka jingiakhun ha ka kylla step hadien ba u Damehun u la khlem shym ban thep ia ka penalty kaba u la shut.
Ha ka jingiakhun ha ka kylla miet la iohi ia ka jingkynroi hapdeng u Lambor Nongsiej bad u Kamara. U Nongsiej u la lait ban shah beh na madan hadien ba u khyrngiat ia u Kamara ha madan.
Ha ka minit kaba 65, u Damehun u la thep ia ka kol na ka bynta ka Nangkiew hadien ba u la pyllait ia ka bol najrong u nongapkol ka Malki. Tang hapoh ki phew sekon, ka Nangkiew Irat ka la thep biang hadien ba u Pouliankhum u la shut na jngai bad ka bol ka la her najrong kol.
Ka Malki ka la iakhun tyngeh ban ioh ban pynphai hynrei ka Nangkiew Irat ka la ioh ia ka penalty. U Kamara u la klem pynsep ei iane ka kabu ksiar bad ban thep ia ka kol kaba lai na ka bynta ka Nangkiew Irat.
Tang lai minit ha shuwa ban kut ka jingiakhun, u Kamara u la thep bakla ia ka bol sha ka kol lajong. Kane ka long ruh ka kol kaba shispah jong kane ka aiom ka SPL.
Ha ka sngi Saitjain, ka Rangdajied United kan iakhun pyrshah ia ka Shillong Lajong ha ka por 4 baje janmiet.
(Dur TSR. Nangkiew Irat jersey rong saw, Malki jersey rong iong)
