Shillong, Nailur 29: Ka kol kaba la thep da u Samuel Lalmuanpuia, ka la iarap ia ka Shillong Lajong ban pynrem noh ia ka Rangdajied United, ha ka jingiakhun hapoh ka Shillong Premier League, kaba la long ha SSA Stadium mynta ka sngi.
Hadien kane ka jingjop, ka Lajong ka la lah ban kamai 19 point katba ka Rangdajied United ka ioh 18 point. Kane ka dei ka sein kaba ar ba Rangdajied ka la mat ia ka jingrem bad baroh ar sein ka la rem ha ka kti ka SLFC.
La iohi ba ka SLFC ka la sdang ban ialehkai bha hynrei ka rukom ialehkai ka Rangdajied ka la nang hiar.
Ha ka jingiakhun mynta ka sngi,ka RUFC ka khlem ioh ktah bha ia ka bol ha ka jingiakhun ha ka kylla step katba ka Lajong ka la lah ban pyllait ia ka bol katba mon.
Ka Rangdajied ka khlem ban khyrwit wat tang shisien ruh ia ka bol shapoh kol. Na ka liang ka SLFC ka la ioh ban khyrwit kumba sien shapoh ka kol ka Rangdajied. Hynrei ym don kawei ruh kaba ki lah ban pyllait na ka kti u nonggapkol ka Rangdajied, u Padam Chettri.
Ha ka minit kaba 35, ka Rangdjied ka la iada ia ka bol ban rung sha kol bad san minit hadien kane, u Aibankupar Dohling u la shah khanglad ar sien ban thep na ka bynta ka Lajong.
Ka Rangdajied ka la pyrshang ban kyntiew ia ka rukom ialehkai ha ka jingiakhun ha ka kylla miet, ha kaba u Reson Malngiang u la long u rangialehkai uba la buh jingeh ia ki nongialehkai ka SLFC.
U Lalrohlua bad u Novin Gurung ki la ialehkai bha sha ka liang kamon bad ki lah ban pyllait ia ka bol bunsien shajan ka box ka Rangdajied. La ioh ba ka jingbakla ban pyllait ia ka bol da uwei na ki nongialehkai ka Rangdajied kaba la aisuk ia ka bol sha u Naorem, uba la buh ia ka bol na ka bynt u Samuel Kynshi. Hynrei ka jingpyrshang da u Samuel ban thep ia ka bol sha kol lada iada biang da u nongapkol ka Rangdajied.
Ka Rangdajied ka la pyrshang tyngeh ban wanphai ha kane ka jingiakhun hynrei kane ka kynhun kaba la shem jingeh ban pynrem ia ka MLP ha ka sngi Baar kam don jubab ia ka rukom ialehkai ka SLFC.
Kawei na ki kabu ksiar ia ka Rangdajied ka la wan ha ka 87 minit hadien ba ka ‘free kick’ kaba la shut da u nongthep kol ba bun tam ia ka kynhun mynta u snem, u Raikutshisha Buam ka la her najrong u dieng kol hadien ba u nongapkol ka Lajong, u Phurba Tempa Lachenpa, u la ioh ban thap ia ka bol.
Ha ka sngi Nyngkong, ka Malki kan iakhun pyrshah ia ka MLP ha ka 4 baje janmiet.
(Dur TSR. Rangdajied United jersey rong blu, Shillong Lajong jersey rong lieh)
