Shillong, Risaw 02: Ka Langsning ka la pynrem ia ka Nangkiew Irat da 4-1 ha ka Shillong Premier Leauge ha ka jingiakhun kaba la long hapoh SSA Stadium, Polo, mynta ka sngi.
Ka Nangkiew ka la ioh ia ar tylli ki kabu ksiar ban thep ha shuwa ba ka Langsning kan ioh thep ia ka kol kaba nyngkong, kaba la thep da u Kitboklang Pale ha ka minit kaba 16.
Ka Langsning kaba la jop ia ka Nangkiew da 3-0 ha ka wat kaba nyngkong, ka la ioh thep ia ka kol kaba ar ha ka minit kaba 43 hadien ba u Kitbok u la buh ia ka bol sha u Ebormi Buam uba la shut ia ka bol sha ka liang kamon u nongapkol ka Nangkiew bad ka bol ka rung sha kol.
Ha ka jingiakhuh ha ka kylla miet, ka Langsning ka la thep ia ka kol kaba lai hadien ba u Figo Syndai u la shah pynkyllon ha u Geoffrey Massar hapoh box. U Fullmoon Mukhim u la thep ia kane ka penalty ba ka Langsning ka la ioh ha ka minit kaba 56.
U Kitbok u la buh biang ia ka bol sha u Donborlang Nongkynrih u ba la mareh na ka liang ka mon bad uba la ioh ban pynkhih ia ka jar.
Tang kawei ka bynta ba ka Langsning ka hap ban pyrkhat ha ka jingiakhun kiba wan ka dei jingai haduh 16 ki ‘foul’. Dei kane ka daw ka la ai ia ka ‘free kick’ kaba la thep da u Barmanroy Nongsiej.
Ka Langsning ka dang iai bat ia ka kyrdan kaba nyngkong da kaba kamai 24 point na ki 10 tylli ki jingiakhun. Ka Nangkiew ka don ha ka kyrdan kaba 5 da kaba ioh 9 point na ki 11 tylli ki jingiakhun.
Lashai ka sngi ka Shillong Lajong kan ialeh pyrshah ia ka Sawmer ha ka por 4 baje janmiet.
(Dur TSR. Langsning jersey rong saw, Nangkiew Irat jersey rong lieh)
