Shillong, Risaw 03: Ki ar kol kiba la thep da u Gamelial Kharlyngdoh ka la iarap ïa ka Sawmer ban iakhaid bad ka Shillong Lajong ha ka jingiakhun ha ka lympung Shillong Premier League kaba la long ha SSA Stadium mynta ka sngi.
Ka resol kaba mih na kane ka jingiakhun mynta ka sngi ka la kylla bak la bak haba ianujor ia ka jingiakhun ha ka wat kaba nyngkong ha kaba ka SLFC ka la jop da 5-1.
Ka Lajong ka la bujli shibun ngut ki nongialehkai da kaba ailad ia u Dameki Khongstia, Seineo Kuki bad Bonison Nongmaithem ban sdang ia kane ka jingiakhun. Hynrei la iohi ba kane ka rai ka la buh jingeh ia ka SLFC khamtam ha ka jingiakhun ha ka kylla step.
Ka Sawmer ka la iakhun tyngeh ha ka jingialehkai ha ka kylla step hynrei na ka daw ba ka la ai bun tylli ki ‘foul’, ka la pynsniew ia ka rukom ialehkai jong ka. Ka Sawmer ka la shah thep hadien ba u Samuel Lalmuanpuia u la thep lyngba ka ‘free kick’ kaba la shut da u Novin Gurung ha ka 14 minit.
Ha ka 57th minit, ka bol kaba la shut da u Kynsailang Khongsit ka la dei ia u dieng kol. Hadien kane, ka Sawmer ka la nion tyngeh sha khmat na ka bynta ban ioh ban phai.
Kane ka jingpyrshang ka la urlong ha ka 67 minit hadien ba u Gamelial u la thep ia ka kol lyngba ka ‘free kick’. Kane ka la ai mynsiem ia ki nongialehkai ka Sawmer ha ryngkat ia ki nongkyrshan.
Saw minit hadien ba ka la ioh ban pynphai, ka Sawmer ka la ioh ia ka penalty bad u Gamelial u la thep ia kane ka ‘penalty’. Kane ka dei ka kol kaba san jong u Gamelial ha ka aiom ialehkai mynta u snem. Kane ka jingtam kaba shi kol na ka liang ka Sawmer kam khlem shan slem. U Parvaj Bhuiya u la thep ia ka kol ha ka sien kaba ar hadien ba u nongapkol ka Sawmer, u Sunshine Kharmuti u lah ban iada ia ka jingpyrshang ban thep ia ka kol ha ka sien kaba nyngkong. Hadien kane ka kol, u Sunshine Kharmuti u la shitom bad ka Sawmer ka la hap ban pynmih bujli da u Mebankyrshan Ryntathiang uba dang 18 snem ka rta.
Kane ka jingiakhaid ka la nang ai mynsiem shuh shuh ia ka Sawmer na ka bynta ki jingiakhun kiba sha khmat. Wat la ka iaryngkat bad ka Malki da kaba ioh mar 7 point hynrei ka Sawmer ka long kham hajrong na ka daw ba ka shah thep duna. Ka Lajong ka sahkut ha ka kyrdan kaba da kaba kamai 20 point na ki 10 tylli ki jingiakhun.
Ha ka sngi Palei, ka Malki kan iakhun pyrshah ia ka Meghalaya Police ha ka por 4 baje janmiet.
(Dur TSR. Shillong Lajong jersey rong saw, Sawmer jersey rong lieh)
