Shillong, Risaw 06: Ka jingiakhun hapdeng ka Rangdajied United bad ka Langsning ha ka SPL kaba la long mynta ka sngi ka la kut noh ha kaba baroh ar tyli ki kynhun ki khlem shym lah ban thep.
Ka Rangdajied kaba la shem jingeh ban ialehkai bha ha ki jingiakhun kiba la dep ka la pyni shisha ia ka rukom ialehkai kaba la buh jingeh ia ka Langsning.
Ka Langsning ka la long ka kynhun kaba kham khlain ha ka jingiakhun ha ka kylla miet, hynrei ka shem jingeh ban pynpra ia ka rangialehkai kiba shadien ka Rangdajied.
Lah ban kdew, ha ka jingiakhun ha ka wat kaba nynkong hapdeng kine ki ar tylli ki kynhun ka la kut noh ha ka jingiakhaid kaba mar shi kol.
Ka Langsning ka la ioh ia ka kabu ksiar ban thep ha ka 34 minit hadien ba u nongialehkai uba shadien ka Rangdajied u la kum bakla haba pyrshang ban ai ia ka bol sha u nongapkol, u Padam Chettri. U Kitboklang Pale u la ioh knieh ia ka bol hynrei u nongapkol ka Rangdajied u la lah ban iada ia ka bol ban rung sha kol.
Ha kawei pat ka liang, u Frolicson Dkhar u la lah ialehkai bha hapoh kol na ka bynta ka Langsning. Ha ka 51 minit u la khanglad ia u Raikutshisha Buam ban ioh thep bad kumjuh u la iada ia ka bol kaba la shut da u Reson Malngiang ha ka 61 minit.
Ka jingbakla na ka liang u Chettri ha ka 84 minit ban kurup ia ka bol kaba la plie lynti ia u Ebormi Buam ban ioh ia ka kabu ban thep hynrei ka bol ka la her najrong ka dieng kol.
Ka Langsning kan sngewdiaw namar kam lah ban jop ia ka jingiakhun mynta ka sngi. Ka jingjop kan pyntikna ba kan ioh bat ia ka kyrdan kaba nyngkong haduh ban da kut ka jingiakhun ha ka league. Kumba long mynta ka Langsning ka la kamai 25 point na ki 11 tylli ki jingiakhun katba ka Rangdajied ka la ioh 19 point na ki 11 tylli jingiakhun.
Ha ka sngi Nynkong, ka Nangkiew Irat kan iakhun pyrshah ia ka Sawmer ha ka por 4 baje. Kane kan long ruh ka jingiakhun kaba khatduh na ka bynta ka Nangkiew Irat ha ka league.
(Dur TSR. Langsning jersey rong saw, Rangdajied United jersey rong lieh)
