Shillong, Risaw 08: Ka Nangkiew Irat ka la jop ia ka jingiakhun kaba khatduh jong ka hapoh ka league da kaba pynrem ia ka Sawmer da 1-0 ha ka Shillong Premier League 2018, kaba la long ha SSA Stadium ha ka sngi Nyngkong. Da kane ka jingjop, ka Nangkiew ka don mynta ha ka kyrdan kaba 4.
U Damehun Syih u la thep ia ka kol ha ka 26 minit ban pyntikna ba ka Nangkiew ka kamai baroh 3 point na kane ka jngiakhun.
Kane ka jingrem ka la pyntikna ba ka Sawmer kan sah ha ki ar tylli ki kyrdan kiba sha tduh duh, kaba mut ba ki lah ban hap hiar biang sha ka First Division. Kumba long mynta ka Sawmer ka ioh 10 point na ki 11 tylli ki jingiakhun bad ka sah sa kawei ka jingiakhun ban ialeh.
Katba ka Nangkiew ka don mynta 12 point na ki 12 tylli ki jingiakhun bad ka tam shi point ia ka MLP, kaba sah ban ialeh sa kawei ka jingiakhun bad ka tam ar point ia ka Malki, kaba dang sah ban ialeh sa ar tylli ki jingiakhun.
Ka Sawmer ka donkam banjop ia ka jingiakhun kaba khatduh bad khamtam ba ka long kaba kynhun kaba don shisha ia ka rukom ialehkai kaba itynnat kham haba phai khmat ia ka jingiakhun pyrshah ia ka Shillong Lajong ha kaba la lah ban pyniakhaid.
Ka Sawmer ka long ka kynhun kaba kham khlain ha kane ka jingialehkai bad ka Nangkiew Irat. Hynrei ka la lah shut tang ar tylli ki bol shapoh ka kol ka Nangkiew Irat ha baroh ka 90 minit jong ka jingiakhun.
Haba phai sha ki kabu ban ioh thep, u William Pouliankhum u la jan ioh thep na ka bynta Nangkiew ha ka 12 minit hynrei ka bol ka la dei ha u dieng kol.
Ha ka 26 minit, u William u la ioh ban buh ia ka bol sha u Damehun uba la rah ia ka bol sha ka liang kamon bad u ba la shut ia ka bol ban thep ia ka kok na ka bynta ka Nangkiew. Kane ka long ka kol kaba 3 kaba la thep u Damehun ha ka SPL mynta u snem.
Ka Nangkiew ka la ioh sa kawei ka kabu ksiar ban thep ha ka jingiakhun ha ka kylla step. U William u la pyrshang ban thep ia ka kol da kaba nion da ka khieh hynrei ka bol ka la lait salit ban rung sha kol.
Ha ka jingiakhun ha ka kylla miet, u Janbor Marbaniang u la ioh ia kawei na ki kabu ksiar na ka bynta ka Sawmer ba kan ioh ban pynphai hynrei ka bol ka la lait salit napoh kol.
U Banpynkhrawnam Nongkhlaw u la pyrshang ban thep ia ka kol da ka khlieh lyngba ka ‘corner’ ha ka 82 minit bad ka bol ka la her najrong kol. Lah ban kdew, ka Sawmer ka la rem da 1-0 ha ka Nangkiew Irat ha ka jingiakhun ha ka wat kaba nyngkong.
Mynta ka sngi, ka MLP kan iakhun pyrshah ia ka SLFC ha ka por 4 baje janmiet.
