Shillong, Risaw 9: Ka MLP ka don ia ka lynti ban hiar sha ka First Division hadien jingshah pynrem ha ka Shillong Lajong da 1-0 ha ka jingiakhun hapoh ka Shillong Premier League 2018, kaba la long hapoh SSA Stadium mynta ka sngi.
U Sheen Sohktung u la thep ia ka kol ha ka 82 minit bad kane ka la pyntikna ba ka SLFC ka lah ban bat ia ka kyrdan kaba ar ha kaba kut ka jingiakhun hapoh ka leauge. Ka jingmih na kane ka jingiakhun ka la pyntikna ba ka Nangkiew Irat kan nym hiar sha ka First Division.
Kumba long ka Nangkiew, ka MLP ruh ka la dep ban ialehkai ia baroh ki jingialehkai hapoh ka league bad ka duna shi point haba ianujor ia ka Nangkiew.
Na ka liang ka Malki ka dang sah ar tylli ki jingiakhun bad ka donkam tang shi point ban lait hiar napoh ka SPL. Ha kajuh ka por, ka Rangdajied United ka lah bat ia ka kyrdan kaba lai tad haduh ban da kut ki jingialehkai hapoh ka league.
Baroh ar tylli ki kynhuh mynta ka sngi ki la la ialehkai da kaba khlain ia ka rukom ialehkai shadien bad ki khmih lynti ba kin ioh ia ka kabu ban thep kol da kaba ther ia ka bol sha khmat.
La iohi ba ka MLP ka la ioh ia ki kabu ksiar ban thep hadien u Emerald Jyrwa u la shut ia ka bol sha kol kaba la ioh kem da u nongapkol ka Lajong, u Neithovilie Chalieu ha ka 18 minit.
Na ka daw ba ka Lajong ka la rai ban ialehkai da kaba pynkhlain shadien, na ka liang ka MLP ka la buh jingeh ia ki nongialehkai ka Lajong da kaba pyni ia rukom ialehkai kaba ym khmih lynti na kane ka kynhun.
Ka MLP ka la ioh ia ka kabu ksiar ban thep ha ka 66 minit hadien ba ka bol kaba la shut da u Teiborlang Siangshai ka la lait salit ban rung shapoh kol.
Lai minute hadien kane, ka Shillong Lajong ka la ioh ia ka lad ban thep ia ka kol hadien ba u nongapkol ka MLP, u Kenio Lyngkhoi u la mih shabar kol hynrei na ka liang ki rangialehkai ka SLFC ki khlem shym lah ban thep ia ka bol shapoh ka kol kaba thylli.
Ka kol ha kane ka jingaikhun ka la wan ha ka 82 minit hadien ka jingiatreilang hapdeng u Mahesh, Samuel, Kynshi bad u Sohktung. Na ka liang u Sohtung u la thep na syndah jong ka kol. Ym don kiwei pat ka kynhun lait noh ka MLP kaba la shah thep ha ki bynta kiba khatduh jong ka jingiakhun.
Ha ka sngi Palei, ka Rangdajied kan ialeh pyrshah ia ka Malki ha ka por 4 baje janmiet.
(Dur TSR. Meghalaya Police jersey rong saw bad blu, Shillong Lajong jersey rong lieh)
