Shillong, Risaw 13: Ka Langsning ka la mad ia ka jingrem kaba nyngkong eh ha ka SPL hadien ba ka la shah jingpynliem ha ka Shillong Lajong da 5-2, ha ka jingiakhun kaba la long hapoh ka SSA Stadium mynta ka sngi.
Namar baroh ar tylli ki kynhun ki la ioh rung lypa sha ka ‘playoff’, kane ka jingiakhun ka long tang na ka bynta ban pyni mano ba kham khlain. Ym lah ban len ba ka Langsning ka la pynmih ia ki nongialehkai kiba kham duna hynrei ki rangialehkai kiba sha khmat ki dang long hi kiba tbit kiba kynthup ia u Donborlang Nongkynrih, Donlad Diengdoh bad u Figo Syndai.
Kane ka jingjop ka pynpoi ia ka SLFC sha ka kyrdan kaba nyngkong ha ka sien kaba nyngkong naduh ba sdang ka aiom ialehkai ka SPL mynta u snem. Ka Lajong ka la thep lyngba u Samuel Kynshi (17′), Bonison Nongmaithem (27′, 54′) bad u Mahesh Naorem Singh (71′, 72′). Ki ar kol na ka bynta ka Langsning ka la wan lyngba u Donborlang Nongkynrih (77′) bad u Defence Nongtdu (90′). Ha shuwa kane, ka Langsning ka la shah thep tang 7 kol bad kam pat shu shah thep palat shi kol ha kawei ka jingiakhun.
Ka Lajong ka pyni shisha ia ka jingthrang ban jop ia kane ka jingiakhun naduh kaba sdang. U Sheen Sohktung ha ka 12 minit u la jan ioh thep hynrei u nongapkol ka Langsning, u Eric Nongkhlaw u la lah ban kurup ia ka bol.
Ka SLFC ka la ioh ban thep ia ka kol kaba nyngkong hadien ba u Lalawmpuia Hnamte u la buh ia ka bol na ka bynta u Kynshi uba la mareh bad ban thep ia ka bol shapoh kol. Ka kol kaba ar ka la wan hadien ba u Sheen u la pyllait ia ka bol na u nongapkol ka Langsning bad pyllait ia ka bol sah u Nongmaithem u ba la thep sha kol.
Ha ka 19th minit, u rangialehkai ka Langsning, u Donlad Diengdoh u la nion ia ka bol da ka khlieh kaba la her najrong kol. Ha ka 31 minit, u Lamare u la shut ia ka bol kaba la dei ai u dieng kol. U Donlad u la jan ioh thep ha ka 40 minit hynrei u nongapkol ka SFLC, u Neithovilie Chalie u la ioh ban thap ia ka bol shabar ka kol.
Ha ka jingiakhun ha ka kylla miet, ka Lansning ka la pynkhlain ia ki nongialehkai kiba shadien bad kane ka la ailad ia ki nongialehkai ka Lajong ban nion sha khmat.
U Nongmaithen u la thep ia ka kol kaba ar ha ka 54 minit lyngba ka bol kaba la buh da u Mahesh. Hadien kane, u Mahesh u la thep ar tylli ki kol tang ha ka por kaba khyndiat. U Mahesh u la thep ia ka kol kaba nyngkong hadien ba u nongapkol ka Langsning u la mih shabar kol. Tang shi minit hadien kane, u Mahesh u la thep biang lyngba ka bol kaba la iarap ban pynbuh da u Hnamte. Hadien ka kol, ka Langsning ka la shah tam da 5-0. Ka Langsning ka la ioh ban pynphai ia kawei ka kol ha ka 77 minit kaba la thep da u Donborlang Nongkynrih. Na ka liang ka Langsning ka la ioh biang ban pynphai biang lyngba ka kol kaba la thep da u Defence Nongtdu ha shuwa ban kut ka jingiakhun.
Ka jingiakhun kaba khatduh jong ka league kan long hapdeng ka Sawmer bad ka Malki ha ka sngi Nyngkong ha ka por 4 baje janmiet. Nalor kine ki ar tylli ki kynhun, ka Malki bad ka MLP kin peit bniah ia kane ka jingiakhun. Ka Sawmer ka la tikna ban hiar hynrei ka Malki ka donkam shi point ban ia ryngkat bad ka Nangkiew Irat bad ban lait ban hiar sha ka First Division.
(Dur TSR. Shillong Lajong jersey rong saw, Langsning jersey rong lieh)
