Shillong, Risaw 15: U nongialehkai ba sha khmat ka Malki, u Joseph Seun u la long u nongialehkai uba nyngkong ban ioh thep ia ka ‘hat-trick’ ha ka Shillong Premier League (SPL) mynta u snem. Bad kane ka la iarap ia ka Malki ban pynrem ia ka Sawmer da 5-1 ha ka jingiakhun kaba la long ha SSA Stadium mynta ka sngi.
Kane ka jingjop ka la iarap ia ka Malki ban poi sha ka ‘playoffs’ ha ryngkat ka Langsning, Shillong Lajong bad ka Rangdajied United. Ka Nangkiew ka la hiar sha ka kyrdan kaba 5 katba ka MLP bad ka Sawmer ki la hiar noh sha ka First Division
U Marlangki Suting bad u Primrose Lamate ki la iarap ban buh ia ka kol kaba nyngkong na ka bynta ka Malki ha ka 5 minit ha kaba la iohi ba u Seun u la ioh rung shapoh ka box bad u la shut ia ka bol shapoh kol. Hadien kane, u Seun u la shah pynkyllon hapoh box kaba la pynioh ia ka Malki ha ka penalty. U Ousseynou Kamara u la thep pa ia penalty ha ka 8 minit ban iarap ia ka Malki ban tam ar la nod.
Hadien kane, ka Malki ka la iakhun tyngeh bad ka la ioh ia kol ha ka 21 minit kaba la thep da u Gamelial Kharlyngdoh. Kane ka kol kaba la thep da u Gamelial ka long shisha kawei na ki kol kiba itynnat tam jong kane ka aiom bad ka la iarap ia u ban long uwei nongthep kol bun tam ha ka SPL 2018 ha ryngkat u Phrangki Buam ka Shillong Lajong. U Gamelial bad u Phrangki ki thep mar 6 kol.
Ha ka jingiakhun ha ka kylla miet, ka Malki ka la ioh thep ia ka kol kaba lai ha ka 49 minit, kaba la thep da u Seun lyngba ka bol kaba la buh da u Dennelson Pyngrope.
Ha ka 62 minit, ka Malki ka la ioh ar tylli ki korner. Ia ka korner kaba nyngkong la iohi ba u nongapkol ka Sawmer u la iada ia ka bol kaba la nion u Seun da ka khlieh. U Seun u la thep ia ka kol lyngba ka korner kaba ar ban iarap ia ka Malki ban tam 4-1.
Ia ka kol kaba khatduh na ka bynta ka Malki la thep da u Ronnie Nongbri ha ka 90+5 minit.
Ka Shillong Lajong kan iakhun pyrshah ia ka Langsning SC ha ka “1st Qualifier” ha ka 18 tarik u Risaw ha ka por 3:30 janmiet.
