Shillong, Risaw 20: Ka jingkulmar hadien ka jingialehkai da kaba nion ia u rephri ka la pynsniew lut ia ka jingiakhun hapdeng ka Rangdajied United bad ka Malki ha ka SPL Eliminator, kaba la long ha JN Stadium mynta ka sngi.
Ka Rangdajied ka la jop da 2-1 ha ka ‘extra time’. Hadien ba baroh arliang ki khlem shym lah ban thep ha ka jingiakhun ha ka kylla step, ka Rangdajied ka la ioh thep nyngkong ha ka 65 minit lyngba ka kol kaba la thep da ka u Chanmetre Thma lyngba ka bol kaba la buh da u Samson Nongrum.
Ka Malki ka la ioh ban pynphai ha ka 78 minit lyngba ka ‘free-kick’ kaba la shut da u Joseph Seun. U Joseph uba la dep ioh lypa ia ka ‘yellow’ card u la shah beh na madan hadien ba u la pynkyllon ia uwei na ki nongialehkai ka Rangdajied. Wat hadien ka jingioh ‘red’ card u Joseph, ka Malki ka la lah ban khanglad ia ka Rangdajied ban thep haduh ban da kut ka jingiakhun ha ka kylla miet.
Ia kane ka jingiakhun la hap rah sha ka ‘extra time’ bad u Chanmetre Thma u la thep biang ha ka 111 minit ban iarap ia ka Rangdajied United ban tam da 2-1. U Thma u la ioh ia katei ka kol hadien ka jingbakla jong u nongapkol ka Malki, u Guidle Syiemleh. Ka long kaba sngewsih na ka bynta ka Malki ban shah thep ia kane ka kol hadien ba u Guidle u la ban iada ia kiba bun tylli ki bol ha shuwa kane.
Hadien kane ka kol,ka la don ka jingpyninia hapdeng u Guidle, u Ousseynou Kamara bad u Marlangki Suting bad kane ka pyni ba kane ka aiom jong ka SPL kam shym la long kaba seisoh na ka bynta ka Malki.
Ki nongkyrshan jong ka Malki kim sngew iahap ia katto katne ki rai jong u rephri bad ki la sdang ban kawang ia ki bilor um sha madan ha shuwa ban kut kane ka jingialehkai. Hadien ba u rephri u la put ban pynwai, ki paid khie bhur ki la rung shapoh madan. Kaba sngewsih ka long ba u rephri u la shah kura ha ki paidbah. Bad dei ki nongialehkai bad ki nongpyniaid jong ka Malki ki la iarap ban tan ia u rephri.
Ka la mih ruh ka jingiatainia hapdeng ki dkhot ka SSA bad ki paidbah tad haduh ban da lah ban pynthanda ia kane ka jingkulmar. Lah ban kdew, ki pulit ki khlem shym don ha madan ban tehlakam ia kane ka jinghuri hura.
Kane kam dei ka sein kaba nyngkong ha kaba u rephri u la shah shoh namar kum kane ka la jia ha ki division kiba kham shapoh.
Ka Rangdajied mynta kan iakhun pyrshah ia ka Shillong Lajong ha ka 2nd Qualifier ha ka 24 tarik u Risaw na ka bynta ban ioh rung sha ka phainal.
(Dur Malki SC. Rangdajied United jersey rong blu, Malki jersey rong iong)
