Shillong, Nailar 1: Ka Langsning ka la pynrem ia ka Nangkiew Irat da 3 kol la nod ha ka jingialehkai kaba nyngkong eh jong ka Shillong Premier League mynta u snem kaba la long hapoh madan JN Stadium mynta ka sngi.
Ia ki goal na ka bynta ka Langsning kaba long ka nongjop ia ka SPL ha une u snem ba la dep la thep da u Banteilang Shylla ha ka 21 minit, u Kitboklang Pale ha ka 27 minit bad u Brolington Warlarpih ha ka minit kiba khatduh jong ka jingiakhun.
Na ka liang u nongap gol ka Nangkiew Irat, u Maitshaphrang Kharmunuid u la khanglad ia ka Langsning ban ioh thep ha ki bynta kaba sdang jong ka jingialehkai. Hynrei, kane ka jinglah ialehkai bha jong u rangap gol ka Nangkiew Irat ka khlem shym pynduh mynsiem ia ka nongjop jong ka SPL. U rangialehkai ka Langsning, u Kitboklang u la lah ban rah ia ka bol sha box ka Nangkiew ha shuwa ba un ai ia ka bol sha u Banteilang u ba lah ban thep ia ka gol ha ka minit kaba 21.
Hadien ba u la iadon bynta ban iarap ban thep ia ka kol kaba nyngkong, u Kitboklang u la lah ban thep hi ia ka gol kaba ar hadien ba u la lah ban kynting ia ka bol nalor ka khlieh jong u Maitshaphrang bad ka bol ka la rung shapoh kol.
Ha kane ka jingiakhun, ka jingtbit jong u rangap gol ka Langsning, u Frolicson Dkhar ka la khanglad ia ka Nangkiew ban ioh thep ia ka gol. Ka Nangkiew ka la ioh ia ka kabu ksiar ban thep gol hadien ba u Richanlang Sympli u la shah leh foul hajan box. Hynrei, ki rangialehkai ka Langsning ki la ban iada ia ka free-kick kaba la shut da u Damehun Syih. Hynrei tang khyndiat minit ka Langsning ka la ioh foul ha ka box ka Nangkiew bad u captain ka Langsning, u Brolington khlem pynsep ei u la lah ban thep ia ka goal ban iarap ia ka kynhun jong u ban jop ia ka jingiakhun da 3 kol la nod.
Ha ka sngi Thohdieng, ka jingialehkai kan long hapdeng ka MLP bad ka Rangdajied United ha ka por 4 baje janmiet.
(Dur TSR. Nangkiew Irat jersey rong saw, Langsning jersey rong lieh)
