Shillong, Nailar 03: Ka Rangdajied United ka la sdang ia ka jingiaid lynti ha ka Shillong Premier League jong une u snem lyngba ka jingjop pyrshah ia ka MLP da ka ar kol la nod ha ka jingiakhun kaba la long mynta ka sngi ha JN Stadium.
Tangba lah ban ong ba ka rukom ialehkai na kane ka kynhun kaba wan ba ar ha ka SPL jong u snem ba la lah, kam shym la long kaba la pynhun ia ki paidbah kiba la wan ban khmih ia kane ka jingiakhun.
Ka Rangdajied ka la ban jop ia kane ka jingialehkai lyngba ka jinglah ban ialehkai bha ha ka kylla miet. Ia ka kol kaba nyngkong la tep da u Ambilstar Sun ha ka 61 minit katba ia ka kol kaba ar la thep da u Samson Nongrum ha ka 85 minit.
Ka jingiakhun ha ka kylla step ka la long kaba suki shisha bad ka jingpyrshang kaba nyngkong eh na ka liang ka Rangdajied ban thep ia ka kol ka la long ha ka 24 minit. Na ka liang u kapten ka Rangdajied, u Bansharai Sun u la pyrshang ban thep kol da ka khlieh hynrei ka bol ka la her nalor u dieng kol.
Bad na ka daw ba duna palat ki lad bad ki kabu ban thep kol, na ka liang u coach ka RUFC, u Khlainpyrkhat Syiemlieh u la hap ban wanrah ia rangialehkai uba sted tam na kane ka kynhun, u Reson Malngiang. Lah ban kdew, u Reson u dei uwei na ki player u ba la thep bun kol tam mynshym snem. Na ka liang ka MLP ka la ialehkai kham bha ha kaba sdang ka jingiakhun jong ka kylla miet. Hynrei ki rangialehkai ka MLP ki khem shym lah ban khyrwit ia ka bol sha ka kol ka Rangdajied United.
Na ka liang ki rangialehkai ka Rangdajied ki khlem shym duh mynsiem wat hadien ba ka MLP ka la lah ban ialehkai kham bha. Ka Rangdajied ka la ioh ia ka korner ha ka 60 minit. Kane ka korner ka la plie lynti ia u Ambilstar ban thep ia ka kol kaba nyngkong ka Rangdajied da ka khlieh.
Hadien kane ka gol, ka MLP ka la duh shibun ki kabu ksiar ban pynphai biang ia ka kol bad dei naduh ka minit kaba 80 ter ter ka Rangdajied ka la lah ban ialehkai bha. Hadien ba u la shah khanglad kumba ar sien ban thep kol, u Samson u la lah ban thep ia ka kol ha ka 85 minit bad kane hi ka la pyntikna ba ka Rangdajied kan jop ia kane ka jingiakhun da ka 2 gol la nod.
Ha ka sngi Saitjain, ka Shillong Lajong kan ialeh pyrshah ia ka Sawmer kaba dei ka kynhun kaba dang shu ioh rung ha ka SPL ha ka por 4 baje janmiet.
(Dur TSR. Rangdajied United jersey rong lieh, MLP jersey rong saw)
