Shillong, Nailar 6: Ka Malki SC ka la sdang ia ka jingiashim bynta ha ka Shillong Premier League mynta u snem, lyngba ka jingjop pyrshah ia ka Nangkiew Irat da 3-1, ha ka jingiakhun kaba la long ha JN stadium mynta ka sngi.
Lah ban kdew, ka Malki ka dei ka kynhun kaba nyngkong jong kane ka aiom, kaba la pynialehkai ia ki rangialehkai na bar ri bad ar ngut na ki ki la thep kol mynta ka sngi. Baroh ki saw tylli ki kol ha kane ka jingiakhun la ioh thep ha ka kylla miet.
Na ka liang rangialehkai na bar ri, u Dieye Hamidou u la thep ar tylli ki kol na ka bynta ka Malki katta ha ka 60 bad 63 minit katba u Joseph A Seun u la thep ia ka kol kaba lai ha ka 84 minit. U Damehun Syih u la iarap ia ka Nangkiew ban pynphai kawei kol ha ka minit kaba 85.
Ym tang ki rangialehkai na bar ri kina la lah ban ialehkai bha na ka bynta ka Malki. Na liang u rangapkol, u Sbing Chyrmang u la lah ban iada ia ka penalty ha ka 39 minit bad kumjuh u Primrose Lamat u la lah ba ialehkai bha sha khmat wat lad u khlem ioh ban thep kol.
Ha ka jingialehkai ha ka kylla miet, ka Malki ka la lah ban ialehkai bha bad kumjuh ban buh jingeh ia ka rangialehkai kiba shadien ka Nangkiew Irat. Na ka liang u Hamidou u la thep ia ka kol kaba nyngkong hadien ba u la nion da ka khlieh lyngba ka jingbuh ia ka bol na ka liang ka kamon bad ban thep ia ka bol sha ka kol.
Ha ka minit kaba 63, u Hamidou u la thep ia ka kol kaba ar na ka bynta ka Malki hadien ba u la khyrwit ia ka bol najrong u rangapkol ka Nangkiew Irat, u Monlang Shylla. Ka kol kaba shutia tam ha kane ka aiom kaba mynta la thep haka 84 minit hadien ba u rangapkol ka Nangkiew Irat u khlem shym lah ban iada ia ka bol kaba suk bha kaba shut la da u Seun bad kane ka kol kaba lai jong ka Malki.
Hynrei, u Damhun Syih u la thep ia ka kol hadien shi minit ban iarap ia ka Malki SC ban pynphai shi kol ha kane ka jingiakhun. Wat hadien kane ka jingrem, ka Nangkiew Irat kan nym da sngewsih than namar ka la lah ban ialehkai kham bha ban ianujor ia ka jingialehkai ba ka la rem ha ka Langsning.
Ha ka sngi Balang, ka Rangdajied United kan ialeh pyrshah ia ka Sawmer ha ka por 4 baje janmiet.
(Dur Malki SC. Malki jersey rong blu, Nangkiew Irat jersey rong lieh)
