Shillong, Nailar 8: Ka Rangdajied United ka la lah ban pynrem ia ka Sawmer da 4-3 ha ka jingiakhun kaba iakhaid bha jong ka Shillong Premier League, kaba la long ha JN Stadium mynta ka sngi.
Ka Sawmer ka la jan lah ban pyniaryngkat hynrei ka Rangdajied United ka long shisha kaba donbok ban jop ia kane ka jingiakhun kaba la pynhun jrut ia ki paidbah kiba la tuid ban wan peit ia kane ka jingialehkai.
U Wallamsuk Nongkhlaw u la thep ia ka kol kaba nyngkong na ka bynta ka RUFC ha ka minit kaba 5 hynrei u Everesterly Rynjah u la pyniaryngkat ia ka Sawmer lyngba ka kol kaba u la thep ha ka 31 minit.
Ka Rangdajied ka la lah ban thep ia ka kol kaba ar ha ka minit kaba 36 lyngba ka kol kaba la thep da u khlur ialehkai, u Samson Nongrum.
Hadien kane kol, ka jingiakhun ka la kylla syndet ha kaba ka Sawmer ka la shah thep sa ar kol, ha kaba sdang jong ka jingialehkai ha ka kylla miet.
U Raikutshisha Buam u la thep ia ka kol ha ka 51 minit katba u Reson Malngiang ia ka kol kaba saw na ka bynta ka Rangdajied ha ka minit kaba 58.
Ki paidbah kiba la tuid sha kane ka jingiakhun kim mut dur shuh ba ka Sawmer kan dang lah ban ialehkai bha bad ban buh ia ka rangialehkai ka Rangdajied ha ka jingeh.
U Marshall Nongrum u la thep ia ka kol kaba ar na ka bynta ka Sawmer ha ka minit kaba 61 bad u Justerwell Tham u la thep ia ka kol kaba lai ha ka 76 minit.
Hadien kane ka kol la iohi ba ki rangialehkai ka Sawmer bad ka Rangdajied ki la pyrshang tyngeh ban thep shuh ia ki kol ha ki bynta kaba kut jong ka jingiakhun.
Wat lada ka la don ka jingpyrshang ban thep kol na baroh liang hynrei ka jingialehkai ka la kut noh ha kaba ka Rangdajied United ka la jop da 4-3.
U rangialehkai ka Rangdajied, u Wallamsuk u la pyniaid sha khmat ia kane ka jingiakhun da kaba thep ia ka kol kaba nyngkong ha ka minit kaba san. Wat la u Wallamsuk u shym lah ban shim ia ka bol ha ka rukom kaba biang ha ka sien kaba nyngkong hynrei u lah ban kynting ia ka bol najrong u rangapkol ka Sawmer, u Sunshine Kharmuti bad ban pynkhih ia ka jar.
U rangialehkai ka Sawmer, u Everesterly u la thep ia ka kol ban pyniakhaid ia kane ka jingiakhun hadien ba ki rangialehkai ka Rangdajied ki lah ban iada ia ka bol kaba la khyrwit da uwei na ka nongialehkai ka kynhun jong u.
Ka jingiakhaid hapdeng kine ki ar tylli ki kynhun ka khlem shym shan slem hadien ba ka Rangdajied ka la ioh ia ka free-kick ha ka minit kaba 36. U Samson u thep ia ka kol lyngba ka ‘bicycle kick’.
La khmih lynti ba kan ialehkai kham bha ha kaba sdang jong ka jingialehkai ha kylla miet hynrei ka Rangdajied ka la ban thep haduh ar kol tang hapoh ka 15 minit. Ia ka kol kaba lai na ka bynta ka Rangdajied ka la wan hadien ba u Samson u la rah ia ka bol sha ka liang kamon bad u la buh ia ka bol na ka bynta u Raikutshisha u ba la nion da ka khlieh ban thep ia ka kol. Hadien kane, u Reson u la lah ban thep ia ka kol ha ka minit kaba 58.
Hadien lai minute, ka Sawmer ka la pynphai kawei ka kol lyngba ka free-kick kaba la shut da u Marshall. Ka kol kaba khatduh ka dei kaba la thep da ka Justerwell da kaba nion da ka khlieh.
(Dur TSR. Rangdajied United jersey rong blu, Sawmer jersey rong lieh)
