Shillong, Nailar 9: Ka long ka sngi kaba sahkynmaw ia u rangapkol ka MLP, u Kenio Lyngkhoi namar ka jinglah jong u ban iada ia ka ka bol ban rung sha ka kol, kaba la ailad ia ka MLP ban pynrem ia ka Shillong Lajong da 1-0 ha ka jingiakhun jong ka Shillong Premier League hapoh JN Stadium mynta ka sngi.
Ia ka kol na ka bynta ka MLP la thep da u Kevin Kharbuli ha ka minit kaba 49.
Ka Shillong Lajong kam shym la long kajuh ka kynhun kaba la pynrem ia ka Sawmer da 5-1 ha kane ka taiew kaba la dep. La iohi ka jingkhein sting na ka liang ki rangialehkai ka Shillong Lajong bad ki la kyndit bynriew tad haduh ba kin da la shah thep.
Ki don ar ki bol kiba la buh da u Samuel Kynshi bad u Mahesh Naorem ha kaba sdang jong ka jingiakhun, hynrei kine ki lad ban thep kol ki la shu syep ei namar ba ym shym don ki rangialehkai ka Shillong Lajong ha ka jaka kaba biang ban thep ia ka kol.
Na ka liang ka MLP ruh ka la ioh ia ar tylli ki lad ban thep kol ha ka kylla step. Hynrei la iohi ba ki rangialehkai ki kham pylleit jingmut ban ialehkai shadien ha kane ka jingiakhun. Ka don tang kawei ka kynti kaba u rangialehkai uba shadien ka Shillong Lajong u la bakla ban ai ia ka bol bad kane ka ailad ia ka MLP ban rah ia ka bol sha khmat.
Ka jingpyrshang na ka liang u Niwan-o Gatphoh ban thep ia ka kol kaba la iada da ki rangialehkai ka Shillong Lajong bad kane ka bol ka la leit sha u Kevin u bym shym la pynsep ei ia ka kabu kisar ban thep ia ka bol sha ka kol.
Hadien kane, ka Shillong Lajong ka la iakhun tyngeh ban ioh ban pynphai biang ia ka kol. Hynrei, haduh kaba kut ka Shillong Lajong kam shym lah ban thep kol.
Ka MLP kan hap ban ai khublei kyrpang ia u Kevin uba la thep ia ka kol bad kumjuh ia u Kenio uba la lah ban khanglad ia ka Shillong Lajong ban thep bad ban pyntikna ba ka MLP kan jop ia ka jingiakhun kaba nyngkong eh jong ka aiom ialehkai mynta u snem.
(Dur TSR. Shillong Lajong jersey rong saw, Meghalaya Police jersey rong iong)
