Shillong, Nailar 17: Ka Nangkiew Irat ka la pynrem ia ka Sawmer da 1-0 ha ka jingiakhun jong ka Shillong Premier League kaba la long mynta ka sngi ha JN stadium. Ia ka kol na ka bynta ka Nangkiew Irat la thep da u Lambor Nongsiej ha ka 77 minit.
Baroh kine ki ar tylli ki kynhun ki dei kiba don sha tdong duh ha kane ka aiom jong ka SPL. Hynrei ka jingiakhun ka long kaba itynnad, wat la ka Nangkiew Irat ka long ka kynhun kaba kham khlain.
Ha shuwa ban sdang ka jingiakhun ka la don ka jingsngapjar kaba shi minit kum ka dak ban niew burom ia u Myntri Rangbahduh barim ka ri, u Atal Bihari Vajpayee, uba la khlad noh mynnin ka sngi, ha ka rta kaba 93 snem.
Ka Nangkiew ka la jan ioh thep ha ka minit kaba ar hadien ba uwei na ki rangialehkai ka Sawmer u la lah ban iada ia ka bol kaba la shut da u Damehun Syih.
Ha ka minit kaba 8, ka Nangkiew ka la ioh ia ka ‘free kick’ bad u Banpynkhrawnam Nongkhlaw u la pyrshang ban thep ia ka kol da ka khlieh hynrei u rangapkol ka Sawmer, u Sunshine Kharmuti u la lah ban iada ia ka bol ban rung shapoh kol. U Justerwell Tham ha ka 19 minit u la ioh ka lad ban iarap ia ka Sawmer ban thep ia ka kol kaba nyngkong, hynrei na ka liang u rangialehkai bashadien ka Sawmer, u Monlang Shylla u la ioh ban kah bad ka bol ka la dei ia u dieng kol.
Ka Sawmer ka la ialehkai kham bha ha kaba sdang jong ka jingialehkai ha ka kylla miet. Hynrei ka khlem shym lah ban pynpoi ia ka bol sha ka kol jong ka Nangkiew Irat. Na ka liang ka Nangkiew ka la lah ban thaw ia bun tylli ki kabu ban thep kol ha ka kylla miet.
Ha shuwa ba u Lambor Nongsiej un ioh thep ia ka kol, u rangapkol ka Sawmer u la lah ban iada ia ka bol kaba la shut da u Roikhih Nongtdu. U Lambor uba la mih madan ha ka kylla miet u la thep ia ka kol ha ka 77 minit ban iarap ia ka Nangkiew Irat ban jop ia kane ka jingiakhun. Une u rangialehkai ka Rangdajied u la lah ban thep ia ka kol hadien ba u la pyllait ia ka bol na ar ngut ki rangialehkai ka Sawmer.
La shai ka sngi, ka nongjop ia ka Shillong Premier League ha une u snem ba la dep, ka Langsning SC kan ialeh pyrshah ia ka Shillong Lajong ha ka por 3:45 janmiet.
(Dur TSR. Sawmer jersey rong saw, Nangkiew Irat jersey rong lieh)
