Shillong, Nailar 30: Ka jingiakhun hapdeng ka Rangdajied United bad ka Langsning SC ha ka Shillong Premier League (SPL), kaba la long ha JN Stadium mynta ka sngi, ka la kut ha jingiakhaid kaba mar shi kol.
Kane ka dei ruh ka sein kaba nyngkong ba ka Rangdajied ka khlem lah ban jop na ki san tylli ki jingiakhun ba ka la dep ban iakhun mynta u snem. Hynrei, kane ka long ka sein kaba ar ba ka Langsning ka la hap ban iasam mar shi point. Ka Rangdajied bad ka Langsning ki long ki ar tylli ki kynhun ki bym pat rem ha aiom ialehkai mynta u snem. Ka Rangdajied mynta ka ioh 13 point bad ka Langsning ka ioh 11 point.
U Donlad Diengdoh uba la mih madan ha ka sien kaba nyngkong mynta ka aiom, u la thep ia ka kol na ka bynta ka Langsning ha ka minit kaba 27, hynrei ka Rangdajied ka la ioh ban pynphai lyngba ka penalty kaba la thep da u Wallamsuk Nongkhlaw ha ka jingiakhun ha ka kylla miet.
Ka Rangdajied ka la sdang ia ka jingiakhun ha ka rukom kaba sted bha katba ka Langsning ka la khlem nion bha ha ka por kaba sdang.
Nalor u Donlad, u Donborlang Nongkynrih u la ioh ban mih madan ha ka sien kaba nyngkong na ka bynta ka Lagnsning. La wanrah ia u Donborlang na ka bynta ban khanglad ia u rangialehkai ka Rangdajied, u Reson Malngiang.
Ha ka minit kaba 27, u Mebankhraw Wahlang u la kum bakla ban ai ia ka bol sha u Donlad, uba la khyrwit ia ka bol sha kol. Tang shi minit hadien kane, u Donlad u la ioh biang ia ka kabu ksiar ban thep hynrei u rangapkol ka Langning, u Padam Chettri u la ioh ban thap ia ka bol sha ka corner. Ha ka 35 minit, ka Rangdajied ka la mut ba ka la ioh ban pynphai hynrei u rephri um shym la shah ia ka kol.
Wat la ka jingiakhun ka la long kaba itynnat ha ki minit kaba khatduh jong ka jingiakhun ha ka kylla step. Ka Rangdajied ka la ioh ia lad ban thep ia ka kol lyngba ka corner hynrei na ka liang Ebormi Buam lane Ronaldkydon Lyngdoh Nonglait ki khlem shym lah ban pyndei hok ia ka bol na ka bynta ban rung sha kol.
Ka penalty ha ka 56 minit ka la mih bun ka jingkylli, khamtam na ka liang ka Langsning. Kaei kaba la jia ka long ba i kumba ba u Dkhar u la ioh kem ia ka bol hynrei u rangialehkai ka Rangdajied, u Andy Mawthoh u la takhuh bad ka bol ka la lait na ka kti jong u kol. U rephri u la ailad ia ka jingiakhun ba kan iaid beit bad u Nongkhlaw u la shah pynkhyllem da u Brolington Warlarpih hapoh box. U Nongkhlaw u la thep lyngba ka penalty ban iarap ia ka Rangdajied ban pyniakhaid. Na ka liang ka Langsning ka la pyrshang tyngeh ban ioh thep biang hynrei ka jingiakhun ka la kut noh ha ka jingiakhaid kaba mar shi kol.
Ha ka sngi Saitjain, ka Malki kan ialeh pyrshah ia ka Sawmer ha ka por 3:45 janmiet.
(Dur TSR. Rangdajied United jersey rong blu, Langsning jersey rong lieh)
