Shillong, Nailur 01: Ka Sawmer ka la ioh ban kamai ia ka point kaba ar ha ka Shillong Premier League mynta u snem hadien ka jingiakhaid ba mar ar kol bad ka Malki ha ka jingiakhun kaba la long ha JN Stadium mynta ka sngi.
Ka jingbakla na ka liang u rangapkol ka Malki, u Sbing Chyrmang ha ka 23 minit kaba la ailad ia ka Sawmer ban thep nyngkong. Ka la Malki ka lah ban wanphai biang ha ka jingiakhun ha ka kylla miet bad kumjuh ban tam ha kane ka jingiakhun da 2-1 lyngba ki kol kiba la thep da u Lakhon Surong (47 minit) bad u Primrose Lawat (70 minit).
Tangba ka Sawmer ka la ioh ban pynphai biang lyngba ka kol kaba la thep da u rangialehkai uba la mih ha ka kylla miet, u Gamelial Kharlyngdoh ha ka 73 minit.
Kane ka jingialehkai hapdeng ki kynhun kiba don ha tdong duh ka la long shisha ka jingiakhun kaba ittynnat naduh kaba sdang. Kawei na ki kabu ksiar ba ka Malki ka la jan ioh ban thep ka dei hadien ba ka bol kaba u Primrose Lawat u la pyrshang ban thep da kaba nion da ka khlieh hynrei u rangapkol ka Sawmer u la ioh ban kurup ia ka bol.
Dei hadien kane ba u rangpakol ka Malki u la bakla ban thep ia ka bol sha kol lajong hadien ba ka bol kaba la pynphai shaidien da u rangialehkai uba shadien, u Ouseynnou Kamara. Wat la ka bol ka la kynthih ha ka rukom kaba bym biang hynrei la khmih lynti ia u rangapkol ka Malki ban un kem ia ka bol. Kane ka jingbakla da u rangapkol ka la pynduh mynsiem ia ki rangialehkai ka Malki khamtam lei lei ba ki la rem ia baroh lai tyll ki jingiakhun ha shuwa kane.
Ka Malki ka la wanrah ia u rangialehkai uba kham slem, u Marlangki Suting uba la shut ia ka bol ha shuwa ban kut ka jingiakhun ha ka kylla miet tangba u rangapkol ka Sawmer u la ioh kem ia ka bol.
Baroh ki buit kiba la wanrah da u coach ka Malki, u L Darlong ka la urlong ha ka jingiakhun ha ka kylla miet namar ka la iarap ia ka Malki ba kan wanphai biang sha kane ka jingiakhun.
Ka Malki ka la ioh ban pynphai ha ka minit kaba 47 hadien ba u Alem Khongwir u la lah ban beh ia ka bol bad u la ioh ban buh na ka bynta u Surong uba la thep ia ka bol marsyndah jong ka kol.
Ka Sawmer kan shym la duh mynsiem hadien ba ka Malki ka la ioh ban pynphai bad ka la ioh ar tylli ki kabu ksiar ban thep hynrei ka dei ka Malki kaba la ioh ban thep ia ka kol kaba ar ha ka 70 minit.
Hynrei dei tang hadien 3 minit, u Janbor Marbaniang u la buh ia ka bol na ka bynta u Gamelial Kharlyngdoh uba la thep ia ka kol ban iarap ia ka Sawmer ban pyniaryngkat ia ka jingiakhun 2-2.
Lyngba ka jingiakhaid bad ka Malki, ka Sawmer ka sahkut hapoh tdong duh da kaba ioh tang 2 point katba ka Malki ka la kiew sha ka kyrdan kaba 5 da kaba ioh saw point. Ka Nangkiew Irat ruh ka ioh 4 point hynrei ka Malki ka long kham hajrong namar ka la pynrem ia ka Nangkiew Irat da 3-1 ha ka jingiakhun kaba la long ha ka 6 tarik u Nailur.
Ha ka sngi Nyngkong, ka Shillong Lajong kan ialeh pyrshah ia ka Rangdajied ha ka por 3:45 janmiet.
(Dur Malki SC. Malki jersey rong blu, Sawmer jersey rong saw)
