Shillong, Nailur 10: Ka jingiakhun hapdeng ka Nangkiew Irat bad ka Shillong Lajong FC, ka la kut ha ka jingiakhaid kaba 2-2, ha ka jingialehkaikaba nyngkong eh jong ka wat kaba ar (second leg) ka Shillong Premier League (SPL), kaba la long ha JN Stadium mynta ka sngi.
Baroh kine ki ar tylli ki kynhun ki la ioh ia ka lad ban tam ha kane ka jingiakhun. Hynrei ka jingiakhun ha shuwa ban kut ka la long hapdeng ki nongialehkai kiba shadien ka Nangkiew Irat bad ki rangialehkai kiba sha khmat ka SLFC.
La iohi ba ki nongialehkai ki la shem jingeh na ka daw ka jingbtuid ka madan khamtam ha ka jingiakhun ha ka kylla step.
Ka dei ka Nangkiew Irat kaba la shah tam nyngkong hadien ba u nongialehkai uba shadien um shym lah ban ther ia ka bol shabar ka box, kaba la ailad ia u Samuel Kynshi ban buh ia ka bol na ka bynta Phrangki Buam uba la thep ia ka kol ha ka minit kaba 4. Kane ka long kaba sted tam jong kane ka aiom. Ka Lajong ka la jan ioh thep biang ha ka 23 minit hadien ba u nongapkol ka Nangkiew Irat, u Maitshaphrang Kharumnuid u la iada ia ka bol kaba la shut da u Sheen Sohktung. Na ka liang ka Nangkiew Irat ka la ioh ban pynphai lyngba ka kol kaba la thep da u Roikhihbha Nongtdu ha ka 36 minit.
Hadien kane ka kol, ka Nangkiew ka la pyni shisha ia ka jingthrang ban jop ia kane ka jingiakhun. Bad dei ha ka 43 minit ba ka Nangkiew Irat ka la tam da 2-1 hadien ba u Khangmiki Pale u la thep ia ka kol. Ka jingiakhun ha ka kylla step ka la kut noh ha kaba Nangkiew Irat ka la lah ban iai bat ia ka jingtam kaba shi kol.
Wat la Nangkiew Irat ka la ioh ban khyrwit haduh 9 sien shapoh ha ka kylla miet hynrei lah ban iohi ba ka kham pylleit jingmut ban ialehkai shadien. Ka Nangkiew Irat ka la ioh ia ka kabu ksiar ban thep biang hadien ba ka bol kaba la shut da u Roikhihbha ka la dei ia u dieng kol.
Ka Shillong Lajong ka la ioh pynphai bad pyniakhaid ia kane ka jingiakhun lyngba ka kol kaba la thep da u Naorem Mahesh Singh ha ka 66 minit. Wat la ka SLFC ka la pyrshang tyngeh ban thep ia ka kol ban ioh ia ka jingjop hynrei lah ban ong ba ka Nangkiew Irat ka la lah ban ialehkai bha ban khanglad ia ka Shillong Lajong bad ban kamai shi point na kane ka jingialehkai kaba mynta ka sngi.
Ha ka sngi Baar, ka Sawmer kan ialeh pyrshah ia ka Rangdajied United ha ka por 5:30 janmiet.
(Dur TSR. Shillong Lajong jersey rong saw, Nangkiew Irat jersey rong lieh)
