Shillong, Nailur 11: Ka jingiakhun hapdeng ka Sawmer bad ka Rangdajied United mynta ka sngi ka la kut noh hadien baroh ar liang ki khlem shym lah ban thep.
Hadien ka jingjur u slap, ki nongialehkai ki la shem jingeh ban ialehkai bha na ka daw ka jingbtuit ka madan ialehkai ha SSA Stadium. Ki nongialehkai na baroh ar liang ki la shem jingeh ban shut ia ka bol. La iohi ruh ba ki nongialehkai ki poi sharud madan hadien ba ki la mareh ban beh ia ka bol.
Wat la ka Rangdajied ka la ialehkai bha ha ka kylla step, hynrei ka dei ka Sawmer kaba la buh jingeh ia ka nongjop ia ka SPL ha u 2013 ha ka kylla miet.
Wat la ka dei ka Sawmer kaba ialehkai bha ha ka kylla miet hynrei ka RUFC ka la ioh ia ka corner ha ka 49 minit. U Bansharai Sun u la shut ia ka bol kaba la dei ia ka met ki rangialehkai kiba shadien ka Sawmer bad u la ioh lad biang ban shut hadien ka la wanphai biang sha u. Hynrei ka bol ka la her najrong u dieng kol.
Ha ka 57 minute, u Reson Malngiang u la shut ia ka bol sha kol hynrei ka bol ka sahkut hapoh ktieh bad u nongapkol ka Sawmer, u Sunshine Kharmuti u la kem suk ia ka bol. Shi minit hadien kane, u rangialehkai ka Sawmer, u Gamelial Kharlyngdoh u la khyrwit tyngeh ha ka box ka RUFC hynrei ka bol ka la sahkut biang ha ktieh.
Ha ka 68 minit, ka Sawmer ka la ioh ia ka kabu ksiar ban thep hadien u Janbor Marbaniang u la shut ia ka bol bad u nongapkol ka Sawmer, u Padam Chettri u la thap ia ka bol shabar kol. Kane ka jingiakhun ka la shu kut noh hadien baroh ar liang ki khlem shym lah ban thep. Lah ban ong ba ka dei ka jingktieh jong ka madan kaba la ktah jur ia ka jingialehkai mynta ka sngi.
Ha ka sngi Balang, ka Langsning SC kan ialeh pyrshah ia ka MLP ha ka por 5:30 janmiet.
(Dur TSR. Sawmer jersey rong saw, Rangdajied United jersey rong lieh)
