Shillong, Nailur 22: Ka Shillong Lajong FC ka la kiew sha ka kyrdan kaba ar ha ka Shillong Premier League hadien ka jingjop ia ka Malki da 2-0, ha ka jingialehkai kaba la long ha SSA Stadium mynta ka sngi.
U Naorem Mahesh u la thep ia ka kol kaba nyngkong na ka bynta ka SLFC ha ka 25 minit bad ia ka kol kaba ar la thep da u Kenstar Kharshong ha ka minit kaba 65.
Mynta ka Lajong ka don 16 point na ki 8 tylli ki jingiakhun bad ka tam shi point ia ka Rangdajied United. Ka Malki ka sahkut ha ka kyrdan kaba 5 da kaba kamai 7 point. Ia kane ka jingiakhun la hap ban pynsangeh ha ka 14 tarik u Nailur na ka daw ka jingjur palat u slap.
Ka madan mynta ka sngi ruh ka long kaba ktieh na ka daw ka jingslap ka bneng ha shuwa ban sdang ka jingialehkai. Ka jingialehkai kam shym da long kaba ittynat ha kaba sdang jong ka kylla step. Wat la ka SLFC ka la jop ia kane ka jingiakhun hynrei lah ban ong ba ka rukom ialehkai kam da long kaba itynnat.
Ha ka 25 minit, u Phrangki Buam u la buh ia ka bol na ka bynta u Naorem uba pyllait ia ka bol na u Dennelson Pyngrope ha shuwa ba un thep ia ka kol. Na ka liang ka Malki ruh ka la ioh ia ka kabu ksiar ban thep kol hynrei ka khlem shym lah ban thep.
Ha shuwa ka kol kaba ar, u Kharshong u la khyrwit ia ka bol kaba la dei ia u dieng kol bad u la thep hadien ba ka bol ka la wanphai biang sha u ha ka minit kaba 65. Ka la mih ka jingkulmar ha ka minit kaba 90 hadien ba u nongialehkai ka Malki, u Ronnie Nongbri u la shah pynkyllon ha u Lalrohlua. Hadien kane u Ronnie u la leit ban byrngem ia u Lalrohlua bad u la khyrniat ia u ha madan. Na ka liang u rephri u la ban beh ia u nongialehkai ka Malki da kaba pyni ia ka “red card”.
Ha ka sngi Nyngkong ka Malki kan ialeh pyrshah ia ka Langsning ha ka por 3:15 janmiet.
(Dur TSR. Malki jersey rong blu, Shillong Lajong jersey rong lieh)
