Shillong, Nailur 24: Ka Langsning ka la pynrem ia ka Sawmer da 3-1, ha ka jiingialehkai hapoh ka Shillong Premier League 2018, kaba la long ha SSA Stadium mynta ka sngi.
U Milancy Khongstia, Ebormi Buam bad u Kynsaibor Lhuid ki la thep na ka bynta ka Langsning katba u Gamelial Kharlyngdoh u la thep na ka bynta ka Sawmer.
Lah ban pynkynmaw, ba ka jingiakhun hapdeng kine ki ar tylli ki kynhun ha ka wat kaba nyngkong ka la kut noh ha ka jingiakhaid, hadien ba ka Langsning ka la pynmih ia ki nongialehkai kiba kham duna (second string).
Tangba ka Sawmer ka la pynkyndit ia ka Langsning ha kaba sdang jong ka jingialehkai mynta ka sngi ha kaba ka bol kaba la shut da u Rheadolf Nongneng Daloi ka la dei ia u dieng kol ha ka minit kaba lai.
Hynrei, ka Langsning ka la thep ia ka kol kaba nyngkong hadien ba u Milancy Khongstia u la shut ia ka bol nabar ka box bad ka la bol ka la rung sha kol wat hadien ba u nongapkol ka Sawmer, u Sunshine Kharmuti u la pyrshang ban iada ia ka bol.
Tang hadien 3 minit, ka Sawmer ka la ioh ia ka ‘free kick’ najan box. U Gamelial u la shut ia ka ‘free kick’ bad u la lah ban pyllait ia kynroh ki rangialehkai ka Langsning bad ka bol ka la rung sha kol.
Ka corner ha ka minit kaba 38 na ka bynta ka Langsing kaba la shut da u Lhuid bad ka bol ka la dei ia u dieng kol bad ka poi sha u Ebormi Buam u ba la thep ia ka kol kaba ar ka Langsning da kaba nion da ka khlieh.
Ka jingialehkai ha kylla step ka long kaba iakhaid. Hynrei ka jingiakhun ha ka kylla meit la iohi ba ka bol ka sahkut beit tang sha ka liang ka Sawmer. U Justerwell Tham u la ioh ia ka kabu ksiar ban thep ha ka 48 minit hynrei nongapkol ka Langsning u la ioh kurup ia ka bol.
Hadien kane ka dei ka Langsning kaba pyniaid ia ka jingiakhun. Ka jingshah pynkyllon u Donlad Diengdoh ha box ka la iarap ia ka Langsning ban ioh ia ka penalty.
U kapten ka Langsning, u Brolington Warlarpih u la ioh lad ar sien ban shut ia ka ‘penalty. Hynrei baroh ka sien u khlem shym lah ban thep.
La iohi shisha ia ka rukom ialehkai ka Langsning lyngba ka kol kaba lai ha kaba u Kynsaibor Lhuid u la thep ia ka kol da kaba shut na jngai lyngba ka bol kaba la buh da u Kitboklang Pale. U Kynsaibor u la thep saw kol na ka bynta ka Langsning ha kane ka aiom mynta u snem.
Ka Langsning ka la ioh 21 point na ki 9 tylli ki jingiakhun da kaba jop 6 tylli bad iakhaid lai tylli. Ka Sawmer ka sah ha ka kyrdan ba 7 da kaba ioh 6 point
Ha ka sngi Baar, ka Rangdajied United kan ialeh pyrshah ia ka MLP ha ka por 3:15 janmiet.
(Dur TSR. Sawmer jersey rong saw, Langsning jersey rong lieh)
