Shillong, Risaw 11: Ka jingsniew jong ka madan ialehkai ka khlem shym la pynthut ia ka rukom ialehkai ka Rangdajied United, ha kaba ka la lah ban pynrem ia ka Malki da 3-1 ha ka SPL ha ka jingiakhun kaba la long ha SSA Stadium mynta ka sngi.
U Andy Mawthoh u la thep ia ka kol ha ka 14 minit hadien ba ka bol ka la wanphai biang sha u hadien ba u nongapkol, u Guidle Syiemlieh u la lah ban iada ia ka bol kaba la shut da u Dawanchwa Challam.
Ka Rangdajied ka la lah ban pyniaid ia ka rukom ialehkai ha ka jingiakhun ha ka kylla step bad ki paidbah kiba la tuid ban peit ia kane ka jingiakhun ki la iap biej ia ka rukom pyllait bol ka RUFC. Ka Rangdajied ka la lah ban ialehkai bha wat hadien ba bun na ki nongialehkai kiba pawkhmat ki la shah pynshong ben kiba kynthup ia u nongapkol, u Padam Chettri, u kapten u Ambilstar Sun, u Mebankhraw Wahlang, u Reson Malngiang bad u Atlanson Kharmaw.
Ha ka 38 minit, u Mawthoh u la don bynta ha ka jingthep ia ka kol kaba ar ha kaba ka bol kaba u la buh shapoh ka box ka Malki ka la dei ia u rangialehkai uba shadien, u Daniel Pynrope bad ka la leit beit sha u Chanmetre Thma u ba la thep ia ka kol.
Na ka liang ka Malki ka la sdang ia ka jingiakhun ha ka kylla miet da kaba buh jingeh ia ki rangialehkai ka Rangdajied.
Ha ka 58 minit, u Joseph Seun u la shah leh ‘foul’ hapoh box bad u rephri u la ai penalty ia ka Malki. U Dieye Hamidou u la thep ia kane ka penalty ban iarap ia ka Malki ban ioh ban pynphai ia kawei ka kol.
Ha ka por ba ka Malki ka pyrshang ban nion sha khmat, ka Rangdajied ka la ioh ban thep ia ka kol kaba lai ha ka 81 minit lyngba u Samson Nongrum.
Kane ka jingjop kan shym la iarap ia ka Rangdajied namar ka sahkut ha ka kyrdan kaba lai da kaba kamai 22 point. Ka Malki ka sah sa kawei ka jingiakhun pyrshah ia ka Sawmer bad ka donkam tang shi point ban lait ban hiar sha ka First Division.
Ha ka sngi Saitjain, ka Shillong Lajong kan iakhun pyrshah ia ka Langsning ha ka por 4 baje janmiet.
(Dur Malki SC. Rangdajied United jersey rong saw, Malki jersey rong iong)
