Shillong, Risaw 18: Ka Langsning ka la pynrem ia ka Shillong Lajong da 3-0 na ka bynta ban ioh rung sha ka phainal jong ka Shillong Premier League, ha ka jingiakhun jong ka 1st Qualifier kaba la long hapoh JN Stadium, Polo, mynta ka sngi.
Ia ki kol na ka bynta ka Langsning la thep da u Kitboklang Pale (35′), Ebormi Buam (42′) bad u Kynsaibor Lhuid (76′). Kane ka long ka sein kaba ar ba ka Shillong Lajong ka khlem shym lah ban thep ha ki 13 tylli ki jingiakhun jong ka SPL mynta u snem.
La iohi baroh ar tylli ki kynhun ki la sdang ia ka jingiakhun da kaba ialehkai suki suki. Hynrei ki paidbah ki sdang ia ka jingrisa hadien ba ki iohi ba u rephri um don ia ka board ha ka por ba ka Langsning ka thmu ban pynmih ia u Kynsaibor Lhuid ha ka jaka jong u Figo Syndai.
U Pale u la ioh thep ia ka kol kaba nyngkong hadien ba ka bol kaba u la shut ka la rung shapoh kol. Ha shuwa ban kut ka jingiakhun ha ka kylla step, ka Langsning ka la ioh thep ia ka kol kaba ar hadien ba u Buam ula thep ia ka kol lyngba ka korner kaba la shut da u Pale.
Wat u la nongapkol ka Langsning u Frolicson Dkhar u khlem shym ioh bol ha ka jingiakhun ha ka kylla step hynrei u la hap ban iada ia ka bol aba la shut da u Sheen Sohktung ha ka 60 minit bad kumjuh ka ‘free-kick’ kaba la shut da u Samuel Lalmuanpuia ha ka 72 minit.
Ka Langsning ka la thep ia ka kol kaba khatduh hadien bau Lhuid u ba la thep ia ka kol lyngba ka bol kaba la buh da u Brolington Warlarpih.
Lah ban kdew, ka Langsning ka la lah ban pynrem arsien ia ka SLFC ha kane ka aiom jong ka SPL. Ka jingjop kaba nyngkong ka la wan ha ka jingiakhun ha ka wat kaba nyngkong ha kaba ka Langsning ka la jop da 3-1. Ha ka jingiakhun kaba dang shu dep, ka Lajong ka la pynrem ia ka Langsning da 5-2.
Ka Rangdajied United mynta kan iakhun pyrshah ia ka Malki ha ka jingiakhun jong ka “Eliminator” ka ban long ha ka sngi Saitjain ha ka por 2 baje janmiet. Ka nongjop ia kane ka jingiakhun kan iakhun pyrshah ia ka SLFC na ka bynta ioh rung sha ka phainal.
(Dur TSR. Shillong Lajong jersey rong saw, Langsning jersey rong lieh bad rong iong)
