Shillong, Risaw 24: Ka Shillong Lajong kan iakhun pyrshah ia ka Langsning ha ka phainal jong ka SPL na ka bynta saw snem kynthih hadien ka jingpynrem noh ia ka Rangdajied United da 2-1, ha ka 2nd Qualifier kaba la long ha JN Stadium mynta ka sngi.
Saw sngi ha shuwa ban long ka jingiakhun kaba nyngkong jong ka I-League 2008-2019, ka Lajong ka la pynshong ia kiba bun na ki rangialehkai kiba tbit jong ka. Kane ka long ka kabu ksiar ia ka Rangdajied ban ioh ia ka jingjop.
Hynrei ki nongialehkai kiba kham khynnah jong ka SLFC ki ialehkai bha shisha na ka bynta ban jop ia kane ka jingiakhun. Wat la ka Rangdajied ka long ka kynhun kaba kham khlain hynrei ka la hap ban mad ia ka jingshah rem.
Kane ka long ka sein kaba lai ba ka Lajong ka la lah ban pynrem ia ka RUFC mynta u snem kaba kynthup ia ki ar tylli ki jingiakhun ha ka league.
Ha ka jingiakhun ha ka kylla step ym shym don ba lah ban thep. Ka Rangdajied ka khlem lah ban ialehkai bha ha kane ka jingiakhun ban ioh rung sha ka phainal bad la iohi ba bun na ki bol kiba ka shut sha kol ki la lait lut sharud.
Ka dei ha ka minit kaba ar ba ka Rangdajied ka la jan ioh ban thep hadien ba ka bol kaba la shut da u Dawanchwa Challam ka la lait salit na kol.
Ha ka minit kaba 16, u Ambilstar Sun u khlem shym lah ban pyndei ia ka bol ban rung sha ka kol bad kane ka dei lyngba ka corner kaba la shut da u Samson Nongrum. Ka Lajong ka la ioh ia ka lad ban thep ha ka 35 minit hadien ba u Bonison Nongmaithem’s u la nion ia ka bol da ka khlieh ban thep ia ka kol hynrei ka bol bol ka la lait salit na kol.
San minit hadien kane, u nongapkol ka Lajong, u Phurba Tempa Lachenpa u la iada ia ka ‘free kick’ kaba la shut da u Samson Nongrum ban rung sha kol.Ha ka minit kaba 66 u Bhuiya u la shah ngiat ha u Sun hapoh ka box bad ka Lajong ka la ioh ia ka penalty. U Allen Lyngdoh Nongbri u la thep ia ka penalty ban thep ia ka kol kaba nyngkong na ka bynta ka SLFC.
Ha ka 69 minit ka bol kaba la shut da u Bhuiya ka la dei ia u dieng kol bad ka bol ka la poi sha u Kynsailang Khongsit u ba la thep ia ka kol kaba ar na ka bynta ka Shillong Lajong.
U Dapbor Bareh ka Rangdajied u la buh ia ka bol ha ka box ha ka 76 minit bad u Belton Lartang u la ioh ban pynphai ia ka kol na ka bynta ka Rangdajied
Ka Rangdajied ka la jan lah ban pyniakhaid hadien ba u nongapkol ka Lajong u la lah ban iada ia ka bol kaba la shut da u Robert Khongjoh ha ka 84 minit. Kane ka long ka sein kaba khatduh ba ka Rangdajied kan ioh ia ka kabu ban pyniaryngkhat ia kane ka jingiakhun.
Lah ban kdew, ka SSA kam pat pynbna ia ka sngi ba pynlong ia ka phainal hapdeng ka SLFC bad ka Langsning na ka bynta ka SPL mynta u snem.
(Dur TSR. Shillong Lajong jersey rong saw, Rangdajied United jersey rong lieh)
