SHILLONG, Naiwieng 02: Ka Langsning mynta u snem ka la rah biang ia ka Shillong Premier League 2018 hadien ba ka lah ban pynliem ia ka Shillong Lajong da ka 1-0 ha ka phainal kaba long ha ka sngi Thohdieng.
Ka Langsning ha u 2017 ka la nongjop ia ka SPL kaba pyniaid da ka Shillong Sport Association ha madan Ground No 1 ka SSA ha Polo hynne ka sngi Thohdieng.
Ka Langsning ka la ioh ia kane ka jingjop lyngba ka namtam u Kitboklang Pale ba la thep lyngba ka ‘free kick’ ha ka kyllastep ha ka 16 minit bad ka kynhun ba la coach da u bah Hering Shangpliang ka la lah ban pynneh ia ka shi kol haduh ban da kut.
Kane ka shi kol jong u Kitboklang ka la pynlong ruh ia u ban un ioh ia ka nam Man of the Match ha kane ka sngi.
Haba phai sha ka jingialehkai phainal bamynta ka sngi baroh ar tylli ki kynhun ki la pyni ia la ki sap ki phong jong ki, hynrei la ioh ban sakhi ba ka Langsning ka kham khlain ha kane ka sngi bad hashuwa ban wai ka kyllastep ruh ka la ioh katto katne ki kabu, hynrei ka khlem lah ban pynurlong.
Haba wanphai ha ka kyllamiet ruh la sakhi ba ka Langsning ka kham khlain, hynrei da ka jingtbit jong u nongap kol ka Shillong Lajong, uba la lah ban iada bun tylli bha ki kol, ki khlem shah thep shuh. Kane ka jinglah ban ap kol bha jong u nongap kol ka Shillong Lajong mynta ka sngi bad ha ki jingialehkai ba la leit u Phurba Temba Lachempa u la ioh ia ka nam Best Goalkeeper.
Ka Langsning kaba la iohrah ia ka namlahduh ka la ioh ia ka song ba T.2 lak,katba ka Shillong Lajong kaba wan baar ka la ioh ia ka song ba T.1 lak.
Ia ka khunsnam bad trophy sha ka nongjop la sam da u myntri ba bat ia ki kam Sport and Youth Affairs u Bah Banteidor Lyngdoh kum u kongsan, uba long ruh u vice president ka SSA ha ryngkat ka jingdonlang u president ka SSA, u Bah Bindo Lanong, Bah Larsing Sawyan, trai ka Shillong Lajong, Bah B Diengdoh, Secretary ka SSA, ki dkhot ka SSA bad kiwei kiwei.
(Dur TSR)
